მიხეილ ჩხენკელი: „9 აპრილს დაღუპულთა ხსოვნა მარადიულია“

საქართველოს პრემიერ-მინისტრის ირაკლი ღარიბაშვილის მეთაურობით მთავრობის წევრებმა 9 აპრილის  მემორიალი გვირგვინითა და ტიტებით შეამკეს და 1989 წლის 9 აპრილს დაღუპულთა ხსოვნას პატივი მიაგეს.

მიხეილ ჩხენკელი: „9 აპრილი ჩვენი ერის თავისუფლებისთვის ბრძოლის სიმბოლოა. ზუსტად 33 წლის წინ ჩვენმა თანამემამულეებმა გმირობისა და თავდადების ისტორიული მაგალითი გვაჩვენეს – საქართველოს თავისუფლების სადარაჯოზე მდგომი ახალგაზრდები სამშობლოს დამოუკიდებლობისთვის ბრძოლას შეეწირნენ. სწორედ ამიტომ, ამ თარიღს დიდი ტრაგიზმითა და, ამავდროულად, უდიდესი სიამაყით აღვნიშნავთ.

1989 წლის 9 აპრილს ქართველებმა უარი თქვეს ტოტალიტარულ რეჟიმზე, აირჩიეს თავისუფლება და ჩვენი ქვეყნის ევროპულ ოჯახში დაბრუნება უმთავრეს მიზნად დაისახეს. ეს პროცესი დღემდე შეუქცევადია და ჩვენი ქვეყანა მტკიცე ნაბიჯებით აგრძელებს  ევროინტეგრაციისკენ სვლას.

9 აპრილს დაღუპულთა ხსოვნა მარადიულია. ჩვენ არასდროს დავივიწყებთ სამშობლოს დამოუკიდებლობისთვის მებრძოლ გმირებს, რომლებმაც საკუთარი სიცოცხლე გაწირეს საქართველოს თავისუფლებისთვის, დემოკრატიული ღირებულებებისა და ევროპული მომავლისთვის!“.

1989 წლის 9 აპრილს, გამთენიისას, საბჭოთა კავშირის შეიარაღებული ძალების ნაწილებმა თბილისის ცენტრში, პარლამენტის შენობასთან მშვიდობიანი საპროტესტო აქცია დაარბიეს. 21 ადამიანი დაიღუპა, ხოლო ათასობით მოქალაქე გაზით მოიწამლა.