სტრასბურგში ევროსაბჭოს განათლების დეპარტამენტის საორგანიზაციო კომიტეტის ყოველწლიური პლენარული სესია გაიმართა
სტრასბურგში ევროსაბჭოს განათლების დეპარტამენტის საორგანიზაციო კომიტეტის (CDEDU) მე-7 ყოველწლიური პლენარული სესია გაიმართა, რომელშიც მონაწილეობა საქართველოს განათლების, მეცნიერებისა და ახალგაზრდობის მინისტრის მოადგილე ბაია კვიციანმა მიიღო.
პლენარული სესიის ფარგლებში, ბაია კვიციანმა საორგანიზაციო კომიტეტის წევრებს ევროსაბჭოს ლტოლვილთა ევროპული კვალიფიკაციების პასპორტის (EQPR) დანერგვის მიმართულებით, საქართველოს მიერ განხორციელებული აქტივობების შესახებ დეტალური ინფორმაცია მიაწოდა.
სესიაზე მონაწილეებმა ევროსაბჭოს ,,განათლების სტრატეგიის 2030“ ძირითადი პრიორიტეტები განიხილეს, მათ შორის, განათლების დემოკრატიული და სამოქალაქო მისია, განათლების სოციალური პასუხისმგებლობა და ციფრული ტრანსფორმაცია.
ევროსაბჭოს განათლების დეპარტამენტის საორგანიზაციო კომიტეტმა შეხვედრისას ასევე კვალიფიკაციების აღიარების პროცესში ხელოვნური ინტელექტის როლის სიღრმისეულად შესწავლის საკითხზე იმსჯელა. კომიტეტმა დადებითად შეაფასა განათლების სფეროში ხელოვნური ინტელექტის გამოყენების რეგულირების მიზნით, ექსპერტთა კომიტეტის ჩამოყალიბების საკითხი და მხარდაჭერა გამოუცხადა „ხელოვნური ინტელექტის წიგნიერების შესახებ“ და „ციფრულ ეპოქაში ისტორიის სწავლების შესახებ“ რეკომენდაციების შინაარსის ზოგად მონახაზს. მონაწილეები შეთანხმდნენ საგანმანათლებლო ტექნოლოგიების (EdTechs) ევროპული შეფასების ჩარჩო დოკუმენტის შემუშავების აუცილებლობაზე.
კომიტეტის დელეგატებმა პლენარულ სესიაზე ასევე იმსჯელეს, ევროსაბჭოს ახალგაზრდობის საორგანიზაციო კომიტეტთან თანამშრომლობით, ფორმალურ და არაფორმალურ განათლებაში მშვიდობის განათლების სწავლების დანერგვაზე.
ბაია კვიციანმა პლენარული დისკუსიების დროს ხაზი გაუსვა მშვიდობის განათლების სწავლების მნიშვნელობას და საკითხის აქტუალობიდან გამომდინარე, ევროსაბჭოს წევრ ქვეყნებთან ერთად სწავლების ფორმატების განსაზღვრის მიმართულებით ერთობლივი მუშაობის აუცილებლობას.
საორგანიზაციო კომიტეტის მომდევნო პლენარულ სესიამდე, კომიტეტის დელეგატები, ევროსაბჭოს განათლების სტრატეგიის პრიორიტეტების შესაბამისად, აქტიურად აგრძელებენ მუშაობას მოსამზადებელი დოკუმენტების შემუშავების პროცესის მონიტორინგის მიმართულებით.
