ალექსანდრე წულაძემ ჩინეთის სახალხო რესპუბლიკაში განათლებისა და ტექნოლოგიების სფეროს წარმომადგენელ ორგანიზაციებთან შეხვედრები გამართა
საქართველოს განათლების, მეცნიერებისა და ახალგაზრდობის მინისტრმა ალექსანდრე წულაძემ ჩინეთის სახალხო რესპუბლიკაში განათლებისა და ტექნოლოგიების სფეროს წარმომადგენელ ორგანიზაციებთან სამუშაო შეხვედრები გამართა.
კერძოდ, მინისტრმა პეკინის ენისა და კულტურის და უცხო ენათა უნივერსიტეტებთან, ასევე, ენის, განათლებისა და თანამშრომლობის ცენტრისა და ორგანიზაცია Huawei-ს წარმომადგენლებთან თანამშრომლობის გაფართოების საკითხები განიხილა.
ალექსანდრე წულაძემ უნივერსიტეტებთან ერთობლივი საგანმანათლებლო პროგრამებისა და სტუდენტთა მობილობის განხორციელების შესაძლებლობებზე იმსჯელა. საუბარი შეეხო განათლების დამადასტურებელი დოკუმენტების ურთიერთაღიარების მიმართულებით პარტნიორობასაც.
ალექსანდრე წულაძემ Huawei-ს კვლევებისა და განვითარების კამპუსი დაათვალიერა და ადგილზე გაეცნო თანამედროვე ტექნოლოგიებს, რომლებსაც მსოფლიოს წამყვანი საგანმანათლებლო დაწესებულებები სასწავლო პროცესის გაუმჯობესების მიზნით იყენებენ.
აღსანიშნავია, რომ მინისტრი პეკინის უცხო ენების უნივერსიტეტში ვიზიტისას ქართული ენის სტუდენტების ჯგუფსაც შეხვდა, რომელსაც ხელმძღვანელობდა ამავე უნივერსიტეტის აზიის სკოლის, ქართული ენის სწავლებისა და კვლევის ოფისის დირექტორი, ქართული ენის პედაგოგი, პო იუენი.
ალექსანდრე წულაძესთან ერთად შეხვედრებს ესწრებოდნენ საქართველოს განათლების, მეცნიერებისა და ახალგაზრდობის მინისტრის მოადგილე, ბაია კვიციანი და საქართველოს საგანგებო და სრულუფლებიანი ელჩი ჩინეთის სახალხო რესპუბლიკაში, პაატა კალანდაძე.
