ბაია კვიციანმა და თამარ ღვამიჩავამ Erasmus+-ის პროექტის ევროპელ პარტნიორებთან სამუშაო შეხვედრა გამართეს

საქართველოს განათლების, მეცნიერებისა და ახალგაზრდობის მინისტრის მოადგილეებმა ბაია კვიციანმა და თამარ ღვამიჩავამ Erasmus+-ის პროექტის ევროპელ პარტნიორებთან სამუშაო შეხვედრა გამართეს.

შეხვედრაზე მხარეებმა ევროკავშირის მიერ დაფინანსებული Erasmus+ CBHE-ის საგრანტო პროექტის – „მიკროკრედიტები საქართველოსა და სომხეთის უმაღლესი განათლების სისტემებისთვის: სამხრეთ კავკასიის შუქურა‘‘ (Micro-GEAR) ფარგლებში განხორციელებულ და დაგეგმილ აქტივობებზე იმსჯელეს.

მინისტრის მოადგილეებმა საუბრისას მსგავსი პროექტების მნიშვნელობას გაუსვეს ხაზი და აღნიშნეს, რომ Micro-GEAR სამხრეთ კავკასიის რეგიონში, უმაღლესი განათლების სფეროს სტრუქტურული რეფორმების მხარდამჭერია და უმაღლესი განათლების სისტემების ხარისხის გაუმჯობესების მძლავრ ინსტრუმენტს წარმოადგენს.

პროექტი მიზნად ისახავს საქართველოსა და სომხეთის ეროვნული კვალიფიკაციის ჩარჩოების განახლებასა და მიკროკრედიტების პრინციპებთან დაკავშირებით, ეროვნულ დონეზე კონსენსუსის მიღწევას. ამასთან, Erasmus+ CBHE-ის საგრანტო პროექტი საგანმანათლებლო საქმიანობას აძლიერებს, რომელიც მიკროკრედიტების მინიჭებით სრულდება და ხელს უწყობს მათ აღიარებას.

Erasmus+-ის ფინანსური მხარდაჭერით მიმდინარე პროექტის პარტნიორები საქართველოსა და სომხეთის სამინისტროები, აკრედიტაციის ეროვნული სააგენტოები და უმაღლესი საგანმანათლებლო დაწესებულებები არიან.

აღსანიშნავია, რომ ევროკავშირის მხრიდან პროექტის კონსორციუმი მოიცავს იტალიის, ესპანეთისა და გერმანიის უმაღლეს საგანმანათლებლო დაწესებულებებს, იტალიის ENIC-NARIC-ის ცენტრსა და ხარისხის უზრუნველყოფის საექსპერტო კომპანიას.