მთავრობის წევრები შაორის ახალგაზრდული ბანაკის მონაწილეებს შეხვდნენ
საქართველოს მთავრობის ფინანსური მხარდაჭერით შაორის ბანაკი ახალგაზრდებს მასპინძლობს.
ბანაკის მონაწილეებს საქართველოს განათლების, მეცნიერებისა და ახალგაზრდობის მინისტრი გივი მიქანაძე, პრემიერ-მინისტრ ირაკლი კობახიძესთან, საგარეო საქმეთა მინისტრ მაკა ბოჭორიშვილთან და კავკასიის საკითხთა კომიტეტის თავმჯდომარე ირაკლი ზარქუასთან ერთად, შეხვდა.
მთავრობის წევრებმა ახალგაზრდებს სიტყვით მიმართეს და მათი მხრიდან დასმულ შეკითხვებს უპასუხეს.
ამჯერად შაორის ბანაკში გერმანიაში, ესპანეთში, ავსტრიაში, თურქეთსა და კანადაში - მცხოვრები ქართული დიასპორის წარმომადგენელი ახალგაზრდები იმყოფებიან.
ხუთდღიანი საბანაკე პროგრამის განმავლობაში ახალგაზრდებს აქვთ შესაძლებლობა, მრავალფეროვან საგანმანათლებლო, სპორტულ და შემეცნებით აქტივობაში ჩაერთონ. მათთვის ტარდება ტრენინგები სხვადასხვა აქტუალურ თემაზე.
შაორის ბანაკი საქართველოს განათლების, მეცნიერებისა და ახალგაზრდობის სამინისტროს სსიპ ახალგაზრდობის სააგენტოს ორგანიზებით იმართება. აფხაზეთის კულტურის, სპორტის და ახალგაზრდულ საქმეთა სააგენტოსთან თანამშრომლობით ბანაკის მომდევნო ერთი ნაკადი მხოლოდ აფხაზეთიდან დევნილ ახალგაზრდებს დაეთმობა.
2025 წელს, შაორის ბანაკი საერთო ჯამში 800-მდე ახალგაზრდას რვა ნაკადად მიიღებს.
