ზვიად გაბისონიამ ტოკიოში ვიზიტის ფარგლებში შეხვედრები გამართა
საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ იაპონიის დედაქალაქ ტოკიოში სამუშაო ვიზიტის ფარგლებში სამუშაო შეხვედრები გამართა – აზიის განვითარების ბანკის (ABD), იაპონიის საერთაშორისო განვითარების სააგენტოს (JICA), ტოკიოს გაეროს უნივერსიტეტის (UNU-IAS), ტოკიოს სამეცნიერო ინსტიტუტის და სენდაის ტოჰოგუს უნივერსიტეტის (Tohoku University) ხელმძღვანელ პირებთან.
შეხვედრებზე მხარეებმა საქართველოსა და იაპონიას შორის განათლების სფეროში არსებული და სამომავლო თანამშრომლობის საკითხები განიხილეს. ყურადღება გამახვილდა მრავალწლიან ნაყოფიერ პარტნიორობაზე და აღინიშნა, რომ ბოლო წლებში საქართველოს განათლების სისტემაში იაპონიის მთავრობის მხარდაჭერით არაერთი მნიშვნელოვანი ინიციატივა განხორციელდა.
ზვიად გაბისონიამ იაპონურ მხარეს მჭიდრო თანამშრომლობისთვის მადლობა გადაუხადა და ორი ქვეყნის უნივერსიტეტებსა და კვლევით ინსტიტუტებს შორის კავშირების გაფართოების მნიშვნელობაზე ისაუბრა.
თავის მხრივ, მასპინძელმა მხარემ დადებითად შეაფასა საქართველოში განხორციელებული საგანმანათლებლო პროექტები და ქართულ მხარესთან თანამშრომლობის გაღრმავების მზაობა გამოთქვა.
სამუშაო შეხვედრებში მონაწილეობა მიიღეს აზიის განვითარების ბანკის (ABD), განათლების და სოციალური მიმართულების მმართველმა დირექტორმა აიაკო ინაგაკიმ, განათლების, ადამიანური და სოციალური განვითარების დირექტორმა შანტი ჯაგანატანმა, აზიის განვითარების ბანკის ინსტიტუტის (ADBI) დირექტორმა ბიუგსიკ ჯუნგმა; იაპონიის საერთაშორისო განვითარების სააგენტოს (JICA) უმაღლესი განათლების საკითხებში გენერალური დირექტორის მოადგილე უედა დაისუკემ; ტოკიოს გაეროს უნივერსიტეტის (UNU-IAS) დირექტორმა, პროფესორმა შინობუ იუმე იამაგუჩიმ; ტოკიოს სამეცნიერო ინსტიტუტის ვიცე-პრეზიდენტმა, პროფესორ იუნ-იჩი ტაკაგამ და სენდაის ტოჰოკუს უნივერსიტეტის (Tohoku University) ვიცე-პრეზიდენტმა, პროფესორ მასაჰირო იამაგუჩიმ.
ვიზიტის ფარგლებში ზვიად გაბისონია ჩიბას პრეფექტურის კაშივანოჰას უმაღლეს სკოლას (Kashiwanoha High School), ტოკიოს უნივერსიტეტების ხელოვნური ინტელექტის კვლევით ცენტრებს და ჰაიტექ ლაბორატორიებს ეწვია. ამასთან, ტექნოტრანსფერის და სტარტაპ-აქსელერატორების იაპონურ მოდელს გაეცნო.
