საგნობრივი სტანდარტების რევიზიასთან დაკავშირებით შემაჯამებელი სამუშაო შეხვედრები დაიწყო
საქართველოს განათლების, მეცნიერებისა და ახალგაზრდობის სამინისტროს ინიციატივითა და ყველა დაინტერესებული მხარის ჩართულობით, საგნობრივი სტანდარტების რევიზიასთან დაკავშირებით შემაჯამებელი სამუშაო შეხვედრები დაიწყო.
პირველი სამდღიანი შეხვედრა, რომელიც კონკრეტული საგნობრივი სტანდარტების განხილვას მოიცავს, განათლების, მეცნიერებისა და ახალგაზრდობის მინისტრმა გივი მიქანაძემ გახსნა.
მინისტრმა სიტყვით მიმართვისას განახლებულ ზოგადი განათლების ეროვნულ მიზნებთან მიმართებაში, საგნობრივი სტანდარტების შესაბამისობაში მოყვანის კუთხით განხორციელებულ საქმიანობაზე ისაუბრა. როგორც გივი მიქანაძემ აღნიშნა, სტანდარტების დამტკიცების შემდეგ ახალი სახელმძღვანელოების შემუშავების პროცესი დაიწყება.
შეხვედრა დისკუსიის რეჟიმში წარიმართა და მონაწილეებს გამოცდილების გაზიარებისა და აქტუალურ საკითხებზე მსჯელობის შესაძლებლობა ჰქონდათ.
სამუშაო შეხვედრები ყველა საგნობრივი სტანდარტის განხილვის კუთხით აქტიურ რეჟიმში გაგრძელდება.
პირველ სამუშაო შეხვედრას, რომელიც 3 დღის განმავლობაში გაგრძელდება და მსოფლიო ბანკის მხარდაჭერით იმართება, საქართველოს განათლების, მეცნიერებისა და ახალგაზრდობის მინისტრის მოადგილე თამარ მახარაშვილი ესწრებოდა.
