ბაია კვიციანი სან დიეგოს სახელმწიფო უნივერსიტეტის წარმომადგენლებს შეხვდა

საქართველოს განათლების, მეცნიერებისა და ახალგაზრდობის მინისტრის მოადგილე ბაია კვიციანი სან დიეგოს სახელმწიფო უნივერსიტეტის წარმომადგენლებს შეხვდა.

შეხვედრის ფარგლებში მხარეებმა ერთობლივად განხორციელებული პროექტები განიხილეს, მათ შორის საგანმანათლებლო პერსონალის უწყვეტი პროფესიული განათლების გაძლიერების სქემა და შესაბამისი მომზადება-გადამზადების მოდულები. განსაკუთრებული ყურადღება გამახვილდა „ინოვაციის, ინკლუზიისა და ხარისხის პროექტზე (I2Q)“, რომლის მიზანს საქართველოში ადრეული და სკოლამდელი განათლების სისტემების გაძლიერება წარმოადგენს.

ბაია კვიციანმა მადლობა გადაუხადა სან დიეგოს სახელმწიფო უნივერსიტეტის წარმომადგენლობას აქტიური პარტნიორობისთვის და განათლების სისტემის სამივე საფეხურზე მიმდინარე სიახლეები გააცნო.

თავის მხრივ, სან დიეგოს სახელმწიფო უნივერსიტეტის გუნდის ხელმძღვანელმა, პროფესორმა ნენსი ფრაიმ დადებითად შეაფასა ურთიერთთანამშრომლობის დინამიკა და ახალი ერთობლივი ინიციატივების განხორციელების მზაობა გამოხატა.

სან დიეგოს სახელმწიფო უნივერსიტეტი საქართველოში სტუდენტებს სთავაზობს ამერიკის ინჟინერიისა და ტექნოლოგიების საბჭოს (ABET) მიერ აკრედიტებულ ამერიკულ საბაკალავრო პროგრამებს საბუნებისმეტყველო-საინჟინრო (STEM) დარგებში, ახორციელებს გაცვლით პროგრამებს ამერიკელი და ქართველი სტუდენტებისათვის, ასევე უზრუნველყოფს ქართველი აკადემიური პერსონალის გადამზადების შესაძლებლობებს ამერიკის შეერთებულ შტატებში.