საჯარო სკოლის მოსწავლეებისთვის კამპანია „პროფესია-პოლიციელი‘‘ იწყება
საქართველოს განათლების, მეცნიერებისა და ახალგაზრდობის და შინაგან საქმეთა სამინისტროების ერთობლივი ინიციატივის ფარგლებში საჯარო სკოლების მოსწავლეებისთვის კამპანია „პროფესია-პოლიციელი“ იწყება, რომლის ძირითადი მიზანია მოზარდების ცნობიერების ზრდა საპოლიციო საქმიანობის თაობაზე.
ახალი პროექტი სასკოლო საზოგადოებას შინაგან საქმეთა სამინისტროს აკადემიაში განათლების, მეცნიერებისა და ახალგაზრდობის მინისტრმა გივი მიქანაძემ და შინაგან საქმეთა მინისტრმა გეკა გელაძემ წარუდგინეს.
მინისტრებმა დამსწრე საზოგადოებას სიტყვით მიმართეს, კამპანიის მნიშვნელობაზე ისაუბრეს და მასში ჩართულ თანამშრომლებს მადლობა გადაუხადეს.
ღონისძიებაზე აკადემიის რექტორმა სოფიო აბულაშვილმა დამსწრე საზოგადოებას კამპანიის შესახებ დეტალური ინფორმაცია მიაწოდა.
კამპანიის ფარგლებში მოსწავლეები ქვეყნის მასშტაბით შინაგან საქმეთა სამინისტროს სტრუქტურულ ქვედანაყოფებს, ტერიტორიულ ორგანოებს, სსიპ-ებსა და საქვეუწყებო დაწესებულებებს ესტუმრებიან, სადაც დანაყოფის წარმომადგენელი ადგილზე გააცნობს დანაყოფის საქმიანობას, დაათვალიერებინებს ინფრასტრუქტურას, აღჭურვილობას და დანაყოფის სპეციფიკის გათვალისწინებით მათ სიმულაციურ აქტივობაში ჩართავს.
