საქართველოს განათლების, მეცნიერებისა და ახალგაზრდობის მინისტრის პირველი მოადგილე ისრაელის სახელმწიფოს განათლების მინისტრს შეხვდა
საქართველოს განათლების, მეცნიერებისა და ახალგაზრდობის მინისტრის პირველი მოადგილე ლევან ღირსიაშვილი ისრაელში სამუშაო ვიზიტის ფარგლებში, ისრაელის სახელმწიფოს განათლების მინისტრს, იოავ კიშს შეხვდა.
შეხვედრაზე მხარეებმა ორ ქვეყანას შორის განათლების სფეროში არსებული თანამშრომლობის გაძლიერების საკითხებზე იმსჯელეს და ერთობლივი ინიციატივების განხორციელების შესაძლებლობები განიხილეს. საუბრისას განსაკუთრებული ყურადღება დაეთმო თანამედროვე საგანმანათლებლო გამოწვევებს, მათ შორის კიბერუსაფრთხოებისა და ხელოვნური ინტელექტის ინტეგრაციას სასწავლო პროცესში.
შეხვედრის დასასრულს, მხარეებმა კონკრეტული ინიციატივების განხორციელების სრული მზადყოფნა გამოთქვეს.
განათლების, მეცნიერებისა და ახალგაზრდობის მინისტრის პირველ მოადგილესთან ერთად შეხვედრას ესწრებოდნენ საქართველოს საგანგებო და სრულუფლებიანი ელჩი ისრაელის სახელმწიფოში ზაზა კანდელაკი და განათლების, მეცნიერებისა და ახალგაზრდობის სამინისტროს საერთაშორისო ურთიერთობების დეპარტამენტის უფროსი ნიკოლოზ ბესელია.
