ბაია კვიციანი ყაზახეთში ტექნოლოგიებისა და ხელოვნური ინტელექტის რეგიონული მასშტაბის სამიტის ფარგლებში მეცნიერებისა და უმაღლესი განათლების მინისტრს შეხვდა
საქართველოს განათლების, მეცნიერებისა და ახალგაზრდობის მინისტრის მოადგილე ბაია კვიციანმა, ყაზახეთის ქალაქ ალმათში სამუშაო ვიზიტის ფარგლებში, მონაწილეობა მიიღო ტექნოლოგიებისა და ხელოვნური ინტელექტის რეგიონული მასშტაბის სამიტში „GITEX AI Kazakhstan 2026“.
სამიტზე ბაია კვიციანმა ორმხრივი სამუშაო შეხვედრა გამართა ყაზახეთის რესპუბლიკის მეცნიერებისა და უმაღლესი განათლების მინისტრ საიასათ ნურბეკთან. შეხვედრაზე მინისტრის მოადგილემ ყაზახ კოლეგას საქართველოს უმაღლესი განათლების სისტემაში მიმდინარე რეფორმების შესახებ მიაწოდა ინფორმაცია.
თავის მხრივ, ყაზახეთის რესპუბლიკის მეცნიერებისა და უმაღლესი განათლების მინისტრმა ქართველ კოლეგას დეტალურად გააცნო ქვეყანაში უმაღლესი განათლების სფეროში განხორციელებული ინიციატივები.
შეხვედრის დასასრულს მხარეებმა უმაღლესი განათლების სფეროში ურთიერთობის გაღრმავების მზაობა გამოთქვეს.
სამიტის ფარგლებში ბაია კვიციანი ყაზახეთის რესპუბლიკის პრეზიდენტის ხელმძღვანელობით გამართულ ხელოვნური ინტელექტის განვითარების საერთაშორისო საბჭოს მეორე სხდომასაც დაესწრო.
