„ცოცხალი წიგნები“ სტამბოლში

საქართველოს განათლების, მეცნიერების, კულტურისა და სპორტის სამინისტროს მხარდაჭერით პროექტ „ცოცხალი წიგნების“ ფარგლებში 19-24 აპრილს ქალაქ სტამბოლს თანამედროვე ქართველ მწერალთა ჯგუფი სტუმრობდა.

ქართულ დიასპორასთან შეხვედრები გამართეს პოეტებმა: მანანა ჩიტიშვილმა, ელა გოჩიაშვილმა, ტარიელ ხარხელაურმა, ვასილ ბესელიამ, ცირა ბარბაქაძემ, ასევე, მუსიკოსმა და მწერალმა მანანა მენაბდემ.

მწერალთა ჯგუფს თან ახლდა პროექტ „ცოცხალი წიგნების“ ხელმძღვანელი. ქეთევან დუმბაძემ სტამბოლში მცხოვრები ქართველი ბავშვებისთვის შეხვედრა „ნოდარ ბაბუს ლექსების დღე“ გამართა და მათ საჩუქრად სამინისტროს მხარდაჭერით ნოდარ დუმბაძის საიუბილეოდ გამოცემული და მხატვარ ნინო ჩაკვეტაძის მიერ ილუსტრირებული საბავშვო ლექსების კრებული „ნოდარ ბაბუს ლექსები“ გადასცა.

4 დღის განმავლობაში ყოველ საღამოს სტამბოლში, ქართულ სახლში „გალაკტიონი“, დაინტერესებულ მკითხველს ჰქონდა საშუალება ქართველ ავტორებს შეხვედროდა. გარდა შეხვედრებისა, გაიმართა ასევე მანანა მენაბდის კონცერტი „სიზმრები საქართველოზე“, რომელმაც დამსწრე საზოგადოების დიდი მოწონება დაიმსახურა. მწერალთა ჯგუფი ქართული ლიტერატურის პოპულარიზაციის მიზნით სტამბოლში თურქ მთარგმნელებსა და გამომცემლებსაც შეხვდა.

„ცოცხალ წიგნებს“ სტამბოლის ქართველთა სათვისტომო და სტამბოლში მცხოვრები მწერალი ირაკლი კაკაბაძე მასპინძლობდა.