გიორგი ამილახვარმა ნორვეგიის ელჩთან შეხვედრა გამართა
საქართველოს განათლების, მეცნიერებისა და ახალგაზრდობის მინისტრმა გიორგი ამილახვარმა საქართველოში ნორვეგიის ელჩთან ბერგლიოტ ჰოვლანდთან სამუშაო შეხვედრა გამართა. მხარეებმა ქვეყნებს შორის არსებული თანამშრომლობის გაღრმავების საკითხები და ერთობლივი პროექტების განხორციელების გზები განიხილეს.
მინისტრმა ელჩს განათლების ყველა საფეხურზე მიმდინარე რეფორმები გააცნო და მადლობა გადაუხადა საქართველოში ინკლუზიური განათლების განვითარების მხარდაჭერისთვის.
საუბარი შეეხო პროექტს „არც ერთი ბავშვი განათლების გარეშე“, რომლის ფარგლებშიც ნორვეგიელი ექსპერტების მონაწილეობით, ინკლუზიური განათლების მხარდამჭერი ახალი ეროვნული სისტემის მოდელი შემუშავდა.
ნორვეგიის ელჩმა დადებითად შეაფასა ინკლუზიური განათლების განვითარების კუთხით სამინისტროს მიერ გადადგმული ნაბიჯები, მინისტრს სამაგალითო პარტნიორობისთვის მადლობა გადაუხადა და თანამშრომლობის გაღრმავების მზაობა გამოთქვა.
