გივი მიქანაძემ მშვიდობის საერთაშორისო დღესთან დაკავშირებულ ღონისძიებაში მიიღო მონაწილეობა
საქართველოს განათლების, მეცნიერებისა და ახალგაზრდობის მინისტრმა გივი მიქანაძემ მშვიდობის საერთაშორისო დღესთან დაკავშირებით გამართულ ღონისძიებაში სახელწოდებით „ახალგაზრდები მშვიდობისთვის“ მიიღო მონაწილეობა.
მინისტრმა დამსწრე საზოგადოებას სიტყვით მიმართა და მშვიდობის მშენებლობის პროცესში ახალგაზრდებისა და მომავალი თაობის განსაკუთრებულ როლზე გაამახვილა ყურადღება.
გივი მიქანაძემ იმედი გამოთქვა, რომ უახლოეს მომავალში საოკუპაციო ხაზების ორივე მხარეს მცხოვრები ახალგაზრდები ერთობლივი ძალებით ჩაუყრიან საფუძველს ერისა და ქვეყნის გამთლიანებას.
ღონისძიება მისასალმებელი სიტყვით გახსნეს საქართველოს პარლამენტის თავმჯდომარემ შალვა პაპუაშვილმა და სახელმწიფო მინისტრმა თეა ახვლედიანმა.
შერიგებისა და სამოქალაქო თანასწორობის საკითხებში სახელმწიფო მინისტრის აპარატის ორგანიზებით გამართული ღონისძიების ფარგლებში, უწყების მიერ დაწესებული ყოველწლიური კონკურსის „მშვიდობის ჯილდოს ახალგაზრდებისთვის“ გამარჯვებულები დააჯილდოვდნენ.
„მშვიდობის ჯილდო ახალგაზრდებისთვის“ დაწესებულია შერიგებისა და სამოქალაქო თანასწორობის საკითხებში საქართველოს სახელმწიფო მინისტრის აპარატის მიერ 2021 წელს და ყოველწლიურად გადაეცემა ახალგაზრდას ან ახალგაზრდების ჯგუფს, მათ შორის ოკუპირებული ტერიტორიებიდან, რომლებსაც საკუთარი საქმიანობით განსაკუთრებული წვლილი შეაქვთ მშვიდობის მშენებლობის და ომით გაყოფილ საზოგადოების წევრებს შორის შერიგებისა და ნდობის აღდგენის პროცესში.
