ბაია კვიციანმა საქართველოში საფრანგეთის ელჩს ოლივიე კურტოს უმასპინძლა
განათლების, მეცნიერებისა და ახალგაზრდობის მინისტრის მოადგილე ბაია კვიციანმა საქართველოში საფრანგეთის საგანგებო და სრულუფლებიან ელჩთან, ოლივიე კურტოსთან სამუშაო შეხვედრა გამართა, სადაც მხარეებმა მიმდინარე ერთობლივი საგანმანათლებლო პროექტები, თანამშრომლობის გაღრმავების საკითხები და სამომავლო გეგმები განიხილეს.
მინისტრის მოადგილემ მადლობა გადაუხადა საფრანგეთის ელჩს საქართველოს განათლების სისტემის მხარდაჭერისთვის და აღნიშნა, რომ ბოლო წლებში ერთობლივი ძალისხმევით არაერთი მნიშვნელოვანი და მასშტაბური, მათ შორის, ქართული-ფრანგული უნივერსიტეტის პროექტი ხორციელდება.
ბაია კვიციანის თქმით, ქართული-ფრანგული უნივერსიტეტი ფრანგული ენისა და კულტურის პოპულარიზაციის კუთხით მნიშვნელოვან როლს ასრულებს და საქართველოს უმაღლესი განათლების ინტერნაციონალიზაციის პოლიტიკის განხორციელების მიმართულებით, ერთ-ერთ მნიშვნელოვან ინსტრუმენტს წარმოადგენს.
შეხვედრის ფარგლებში მხარეებმა საქართველოს უმაღლესი განათლების რეფორმის ძირითადი მიმართულებების გათვალისწინებით აღნიშნული პროექტის გაფართოების შესაძლებლობები განიხილეს და მასში პროფესიული განათლების კომპონენტის ინტეგრირების თვალსაზრისით გადასადგმელ ნაბიჯებზე იმსჯელეს.
თავის მხრივ, საფრანგეთის ელჩმა მინისტრის მოადგილეს ერთობლივი ინიციატივების განხორციელების მზაობა დაუდასტურა.
