გივი მიქანაძე ისრაელის ინოვაციების, მეცნიერებისა და ტექნოლოგიების მინისტრ გილა გამლიელს შეხვდა
ისრაელის სახელმწიფოში სამუშაო ვიზიტის ფარგლებში საქართველოს განათლების, მეცნიერებისა და ახალგაზრდობის მინისტრი გივი მიქანაძე ინოვაციების, მეცნიერებისა და ტექნოლოგიების მინისტრ გილა გამლიელს შეხვდა.
მხარეებმა საქართველოსა და ისრაელს შორის ინოვაციებისა და მეცნიერების სფეროებში თანამშრომლობის გაღრმავების პერსპექტივები განიხილეს.
ყურადღება გამახვილდა განათლების სისტემაში თანამედროვე ტექნოლოგიების ინტეგრირების კუთხით გამოცდილების გაზიარებასა და ერთობლივი სამეცნიერო-კვლევითი პროექტების განხორციელების მნიშვნელობაზე.
მინისტრებმა თანამშრომლობის გაფართოების მზადყოფნა გამოთქვეს და შეთანხმდნენ, რომ უახლოეს პერიოდში ქვეყნებს შორის გაფორმდება მემორანდუმი, რომელიც მეცნიერებისა და ინოვაციების სფეროებში მჭიდრო პარტნიორობას ითვალისწინებს.
შეხვედრის დასასრულს გივი მიქანაძემ გილა გამლიელი საქართველოში მოიწვია.
მინისტრების შეხვედრას ქნესეთის საქართველოსთან მეგობრობის ჯგუფის ხელმძღვანელი დევიდ ბიტანი, ისრაელის სახელმწიფოში საქართველოს საქმეთა დროებითი რწმუნებული სოფიო ოტიაშვილი, საქართველოს დელეგაციის წევრები და ქნესეთის წარმომადგენლები ესწრებოდნენ.
