ახალი სასწავლო წლის დაწყებამდე თამარ მახარაშვილი საჯარო სკოლების დირექტორებსა და რესურსცენტრების ხელმძღვანელებს შეხვდა

საქართველოს განათლების, მეცნიერებისა და ახალგაზრდობის მინისტრის მოადგილე თამარ მახარაშვილი აღმოსავლეთ საქართველოს საჯარო სკოლების დირექტორებსა და რესურსცენტრების ხელმძღვანელებს შეხვდა.

მინისტრის მოადგილემ ზოგადი განათლების სისტემის რეფორმის ეროვნული კონცეფციის ფარგლებში 2026-2027 სასწავლო წლისთვის დაგეგმილ ცვლილებებსა და სიახლეებზე ისაუბრა.

განსაკუთრებული ყურადღება დაეთმო სახელმძღვანელოებს, ეროვნულ სასწავლო გეგმას, განახლებულ საგნობრივ სტანდარტებს, სასკოლო ფორმებსა და მასწავლებელთა პროფესიული განვითარებისა და მხარდაჭერის მექანიზმებს.

საუბარი კითხვა-პასუხის ფორმატში წარიმართა. შეხვედრის მონაწილეებმა მათთვის საინტერესო საკითხებზე დამატებითი ინფორმაცია მიიღეს და საკუთარი მოსაზრებები გააზიარეს.

შეხვედრები გაიმართა თბილისში, რუსთავსა და ბორჯომში. მათ ქვემო ქართლის, კახეთის, შიდა ქართლისა და სამცხე-ჯავახეთის რეგიონების საჯარო სკოლების დირექტორები და რესურსცენტრების ხელმძღვანელები ესწრებოდნენ.