ბაია კვიციანმა საქართველოში UNICEF-ის წარმომადგენელთან შეხვედრა გამართა

საქართველოს განათლების, მეცნიერებისა და ახალგაზრდობის მინისტრის მოადგილე ბაია კვიციანმა და საქართველოში  გაეროს ბავშვთა ფონდის (UNICEF) წარმომადგენელმა იესპერ მოლერმა  სამინისტროსა და UNICEF-ს შორის არსებულ გრძელვადიან და სტრატეგიულ თანამშრომლობაზე იმსჯელეს.

შეხვედრაზე მხარეებმა განიხილეს ერთობლივი პროექტები, რომლებიც მიზნად ისახავს სკოლამდელი და ზოგადი განათლების სერვისებზე ხელმისაწვდომობის გაუმჯობესებას. საუბარი შეეხო აღნიშნული მიმართულებით უკეთესი კოორდინაციისთვის გადასადგმელ ნაბიჯებს, ასევე ბავშვთა აკადემიური მოსწრების ხელშესაწყობად სოციალური მუშაკების როლს.

UNICEF-ის წარმომადგენელმა დადებითად შეაფასა განათლების სფეროში სამინისტროსთან მრავალწლიანი პარტნიორობა და ხაზი გაუსვა სამომავლო თანამშრომლობის კიდევ უფრო გაძლიერების მნიშვნელობას ბავშვების გრძელვადიანი კეთილდღეობის უზრუნველსაყოფად.

განათლების, მეცნიერებისა და ახალგაზრდობის სამინისტროს UNICEF-თან თანამშრომლობა მოიცავს ისეთ მიმართულებებს, როგორებიცაა სკოლამდელი განათლების სტანდარტები და საკანონმდებლო განვითარება, სკოლებში ძალადობის პრევენციის მექანიზმების გაძლიერება, მედია წიგნიერების ინტეგრირება ფორმალურ განათლებაში, მოწყვლადი ჯგუფების ბავშვებისთვის განათლების სერვისებზე ხელმისაწვდომობის გაზრდა და სხვა.