სკოლების მშენებლობისა და რეაბილიტაციის საკითხებზე უწყებათაშორისი კომისიის მორიგი სხდომა გაიმართა
ზოგადსაგანმანათლებლო დაწესებულებების მშენებლობისა და რეაბილიტაციის საკითხებზე უწყებათაშორისი კოორდინაციისა და კონსულტაციის მიზნით შექმნილი კომისიის მორიგი სხდომა გაიმართა.
სხდომის მონაწილეებმა საჯარო სკოლების მშენებლობისა და სარეაბილიტაციო სამუშაოების მიმდინარეობა განიხილეს, ინფრასტრუქტურული პროექტების განხორციელების პროცესში არსებულ გამოწვევებზე იმსჯელეს და მათი ეფექტიანად გადაჭრის გზებზე შესაბამისი რეკომენდაციები შეიმუშავეს.
განსაკუთრებული ყურადღება დაეთმო პროცესში ჩართულ უწყებებს შორის ეფექტიანი კოორდინაციის მნიშვნელობას, რაც აუცილებელია სკოლების მშენებლობისა და რეაბილიტაციის სამუშაოების დაგეგმილ ვადებში და სათანადო ხარისხით შესრულებისთვის.
უწყებათაშორისი კომისიის სხდომაში მონაწილეობდნენ საქართველოს განათლების, მეცნიერებისა და ახალგაზრდობის მინისტრის პირველი მოადგილე ლევან ღირსიაშვილი, მინისტრის მოადგილე თამარ მახარაშვილი, საქართველოს რეგიონული განვითარებისა და ინფრასტრუქტურის მინისტრის მოადგილეები მზია გიორგობიანი და ილია ბეგიაშვილი, საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე მარიამ ლაშხი, მუნიციპალური განვითარების ფონდის აღმასრულებელი დირექტორი გიორგი შონია, ლევან სამხარაულის სახელობის სასამართლო ექსპერტიზის ეროვნული ბიუროსა და შესაბამისი უწყებების სხვა წარმომადგენლები.
კომისიის საქმიანობის მიზანია საჯარო სკოლების ინფრასტრუქტურული პროექტების განხორციელების პროცესში უწყებათაშორისი თანამშრომლობის გაძლიერება, არსებული გამოწვევების დროული იდენტიფიცირება და კოორდინირებული გადაწყვეტილებების მიღება.
