აჭარის რეგიონის წარჩინებული მოსწავლეები დასაჩუქრდნენ
საქართველოს განათლებისა და მეცნიერების მინისტრის მოადგილემ ნოდარ სურგულაძემ პრეზიდენტის საჩუქარი - პერსონალური კომპიუტერები “Lenovo” ამჯერად, აჭარის რეგიონის 130 წარჩინებულ მეათეკლასელს გადასცა. დაჯილდოებაში მონაწილეობა მიიღო აჭარის განათლების, კულტურისა და სპორტის მინისტრმა გია აბულაძემ.
ნოდარ სურგულაძის განცხადებით, მოსწავლეებს შორის სწავლისადმი ინტერესის გაზრდის მიზნით, საქართველოს განათლებისა და მეცნიერების სამინისტრო არაერთ პროგრამას ახორციელებს. მათ შორისაა საშუალო სკოლის საბაზო საფეხურის მოსწავლეთა წახალისების პროექტი, რომელიც პრეზიდენტის ნაციონალური პროგრამის - ”ჩემი პირველი კომპიუტერი” ფარგლებში ხორციელდება.
მოსწავლეთა წახალისების ეს პროექტი რამდენიმე წელია ხორციელდება. პორტატული კომპიუტერებით ის მოსწავლეები ჯილდოვდებიან, რომლებმაც საბაზო საფეხური წარჩინებით დაამთავრეს. 2011 წელს საქართველოს მასშტაბით კომპიუტერებით სულ 1108 წარმატებული მოსწავლე დაჯილდოვდა. სამინისტრო წარჩინებულ მოსწავლეებს მომავალშიც წაახალისებს.
