თბილისის 47-ე საჯარო სკოლაში სპორტის გაკვეთილების პილოტირება დაიწყო
პილოტირებულ სკოლათა შორის მალე სასკოლო ჩემპიონატი დაიწყება სპორტის სამ სახეობაში: ფეხბურთი, კალათბურთი და ფრენბურთი, სახეობებს სკოლები სურვილისამებრ ირჩევენ. ტურნირი რამდენიმე ეტაპად საპილოტე სკოლებს შორის ჩატარდება, მასში ვაჟებთან ერთად გოგონათა გუნდებიც იასპარეზებენ. ჩემპიონატს ორგანიზებას განათლებისა და მეცნიერების სამინისტროსთან ერთად კულტურის, ძეგლთა დაცვისა და სპორტის სამინისტრო და სპორტისა და ახალგაზრდობის საქმეთა დეპარტამენტი გაუწევენ.
2010-2011 სასწავლო წლიდან ეროვნულ სასწავლო გეგმაში შევა ცვლილება, რომელიც გამოიხატება ფიზიკური განათლებისა და სპორტის სხვადასხვა სახეობების ინტეგრაციაში და იგი საქართველოს ყველა საჯრო სკოლაში განხორციელდება. შეიქმნება შესაბამისი სასწავლო პროგრამა, გადამზადდება პედაგოგები და მოეწყობა ინფრასტრუქტურა.
სკოლებში სპორტის გაკვეთილების დანერგვა მოხდება ისე, რომ გათვალისწინებული იქნება როგორც სკოლის, ასევე თითოეული მოსწავლის სურვილი და შესაძლებლობები. ამისათვის დიდი სამუშაოები ჩაატარა განათლებისა და მეცნიერების სამინისტროში შექმნილმა ფიზიკური და სასპორტო განათლების სტრატეგიის შემმუშავებელმა კომისიამ. რომლის შემადგენლობაში მოწვეულნი იყვნენ საქართველოს კულტურის, ძეგლთა დაცვისა და სპორტის სამინისტროს, სპორტისა და ახალგაზრდობის საქმეთა დეპარტამენტის, საქართველოს პარლამენტის, მძლეოსნობისა და ხელბურთის ფედერაციების, თბილისის მერიის სოციალური მომსახურებისა და კულტურის საქალაქო სამსახურის, თბილისის სახელმწიფო სამედიცინო უნივერსიტეტის, ფიზიკური მედიცინისა და რეაბილიტაციის დეპარტამენტის, რაგბის განვითარების კომიტეტისა და რაგბის კავშირის სანაკრებო კომიტეტის, საქართველოს განათლებისა და მეცნიერების სამინისტროს ეროვნული სასწავლო გეგმებისა და შეფასების ცენტრის, საჯარო სკოლების, საქართველოს სპორტული ცეკვის პროფესიული საბჭოს, ილიას სახელმწიფო უნივერსიტეტის ბიზნესის და სამართლის ფაკულტეტის ცენტრის (სპორტის კოლეჯი), საგანმანათლებლო და სამეცნიერო ინფრასტრუქტურის განვითარების სააგენტოს წარმომადგენლები.
ფიზკულტურის გაკვეთილების სპორტის გაკვეთილებით შეცვლასთან დაკავშირებით საქართველოს პრეზიდენტის ინიციატივა, მოზარდებში სპორტის პოპულარიზაციას ითვალისწინებს. საქართველოში, სადაც 2179 საჯარო სკოლიდან სპორტული დარბაზი 1569, ხოლო სპორტული მოედანი 2015 სკოლას აქვს, ფიზკულტურის გაკვეთილები მაინც არაპოპულარულია. აქედან გამომდინარე, საჯარო სკოლებში ფიზკულტურის გაკვეთილებს სპორტის გაკვეთილები ჩაანაცვლებს და პროცესი მოსწავლეებისთვის უფრო საინტერესო და აზარტული გახდება.
