„ექსკურსია თეატრებში“- პროექტი სკოლის მოსწავლეებისთვის

საქართველოს განათლებისა და მეცნიერების სამინისტროს მხარდაჭერით, კულტურისა და ძეგლთა დაცვის სამინისტრო იწყებს მასშტაბურ პროექტს სკოლის მოსწავლეებისთვის - „ექსკურსია თეატრებში“, რომლის მიზანიც სკოლის მოსწავლეების თეატრალური ხელოვნებით დაინტერესებაა.

აღნიშნულ პროექტთან დაკავშირებით, საქართველოს კულტურისა და ძეგლთა დაცვის მინისტრმა მიხეილ გიორგაძემ და განათლებისა და მეცნიერების მინისტრმა თამარ სანიკიძემ დღეს ბრიფინგი გამართეს.

პროექტის „ექსკურსია თეატრებში“ ფარგლებში, საქართველოს მასშტაბით ყველა სკოლის მოსწავლეს საშუალება ექნება ესტუმროს სასურველ თეატრს, დაათვალიეროს სცენა, საგრიმიორო, კულისები, რადისტის (ხმის რეჟისორი) და გამნათებლის ოთახები, აგრეთვე დეკორაცია და თეატრალური კოსტიუმები. სკოლის მოსწავლეები გაეცნობიან თეატრის არქივს და ისტორიას, დაესწრებიან რეპეტიციას, პირადად შეხვდებიან თეატრის რეჟისორებსა და მსახიობებს, სპექტაკლებზე დასასწრებად კი, ისარგებლებენ 50%-იანი ფასდაკლებით.

პროექტის პირველ ეტაპზე ერთვება კულტურისა და ძეგლთა დაცვის სამინისტროს დაქვემდებარებაში მყოფი 11 თეატრი. ეტაპობრივად, წლის ბოლომდე, პროექტში საქართველოს ყველა თეატრი ჩაერთვება.

თეატრში ექსურსიის დასაგეგმად, დაინტერესებულ პირებს საშუალება აქვთ, ვებ გვერდზე - http://www.culture.gov.ge/index.php?module=text&page=excursion&link_id=96  აირჩიონ სასურველი დანიშნულება, გაეცნონ შემოთავაზებულ სერვისებს, შეავსონ განაცხადი და დაგეგმონ ექსკურსია.