მეცნიერებს ხელფასები 150-200 ლარიდან 700-800 ლარამდე გაეზარდათ
თამარ სანიკიძის განცხადებით, წლების მანძილზე მეცნიერების სფეროს მწირი დაფინანსება და მეცნიერების მიზერული ანაზღაურება სერიოზულ პრობლემას წარმოადგენდა ქვეყანაში. ამდენი წლის შემდეგ ამ პრობლემის მოგვარება მნიშვნელოვნად გაზრდის მეცნიერების პოპულარიზაციას, სამეცნიერო კვლევების რაოდენობას, მათ ხარისხს და რაც მთავარია, ხელს შეუწყობს ახალგაზრდა მეცნიერების მოზიდვას ამ სფეროში.
მინისტრის თქმით, საქართველოში მეცნიერების განვითარებისა და პოპულარიზაციის მიზნით, ბევრი მნიშვნელოვანი ნაბიჯი გადაიდგა და მათ შორისაა მეცნიერების გაზრდილი შრომითი ანაზღაურება. მეცნიერთა ხელფასები 2015 წლის პირველი იანვრიდან 2,5-ჯერ გაიზარდა. განხორციელებული პროექტების პარალელურად, ასევე განსაზღვრულია შემდგომი ეტაპები.
პირველ რიგში აღსანიშნავია, რომ უცხოეთში მოღვაწე ქართველი მეცნიერებისა და საქართველოს განათლებისა და მეცნიერების სამინისტროსთან არსებული სამეცნიერო საბჭოს დახმარებით, უმაღლეს საგანმანათლებლო დაწესებულებებში ინტეგრირებული სამეცნიერო-კვლევითი დაწესებულებების გრძელვადიანი (საშუალოდ 10 წლიანი) სამოქმედო გეგმების შეფასება განხორციელდა.
პირველად საქართველოში, სამეცნიერო-კვლევითი დაწესებულებების სამომავლო საქმიანობის შეფასებისას გათვალისწინებულ იქნა პროგრამის ფარგლებში წარმოდგენილი კვლევების აქტუალობა, სამეცნიერო პუბლიკაციები, ციტირების ინდექსი, პატენტები, პროექტები, გრანტები, საერთაშორისო სამეცნიერო თანამშრომლობა და სხვა კრიტერიუმები. შედეგად:
- განისაზღვრა მეცნიერულად დასაბუთებული გრძელვადიანი სამეცნიერო პროგრამები;
- მოწესრიგდა სამეცნიერო თანამდებობებზე დასაქმებულ პირთა სახელფასო პოლიტიკა;
- მეცნიერთა ხელფასები საშუალოდ 250 %-ით გაიზარდა, რაც ხელს შეუწყობს მეცნიერის პრესტიჟის ამაღლებას და შესაბამისად, ახალგაზრდა მეცნიერთა მოზიდვას/ჩართვას სამეცნიერო საქმიანობაში;
- დაიგეგმა სამეცნიერო საქმიანობის შეფასების ადეკვატური სისტემა, რომლის არარსებობა მნიშვნელოვნად აფერხებდა სისტემის განვითარებას.
განათლებისა და მეცნიერების სამინისტროს მიერ განხორციელებულ, მეცნიერების მხარდამჭერ სხვა პროგრამებთან ერთად, გრძელვადიანი სამეცნიერო პროგრამების განხორციელება და პროგრამის ფარგლებში მეცნიერების დაფინანსების ზრდა, არის ის მნიშვნელოვანი ნაბიჯი, რომელიც არის აუცილებელი საქართველოში მეცნიერების შემდგომი განვითარებისათვის.
საქართველოში მეცნიერების განვითარების, უმაღლეს საგანმანათლებლო დაწესებულებებში არსებული ინტელექტუალური პოტენციალის მიზნობრივად გამოყენების, სამეცნიერო კვლევებისთვის პირობების შექმნის, ახალგაზრდა სამეცნიერო პერსონალის მომზადების, სწავლის, სწავლებისა და სამეცნიერო კვლევების ინტეგრაციის ხელშეწყობის მიზნით სამომავლოდ იგეგმება:
- „მეცნიერების, ტექნოლოგიების და მათი განვითარების შესახებ“ და „უმაღლესი განათლების შესახებ“ საქართველოს კანონებში ცვლილებების განხორციელება უმაღლეს საგანმანათლებლო დაწესებულებებში მეცნიერების სტატუსისა და უფლება-მოვალეობების განსაზღვრის მიზნით;
- უმაღლეს საგანმანათლებლო დაწესებულებებში ინტეგრირებულ სამეცნიერო-კვლევით ინსტიტუტებში ატესტაციების ჩატარება და სამეცნიერო თანამდებობებზე ღია კონკურსის წესით მეცნიერ-თანამშრომლების არჩევა;
- თითოეულ სამეცნიერო-კვლევითი ინსტიტუტის შესაძლებლობების შეფასება ეკონომიკური საინოვაციო განვითარების და ასევე, უმაღლესი განათლების განვითარების ხელშეწყობის კუთხით (დოქტორანტებთან და მაგისტრანტებთან მუშაობა);
- სამეცნიერო კვლევებისა და ინოვაციების პრიორიტეტული მიმართულებების დადგენა და შესაბამისი კვლევითი ინსტიტუტების ინფრასტრუქტურის გაძლიერება-განვითარება.
