სასკოლო სპორტული ოლიმპიადა

ქალაქ გორში სასკოლო სპორტული ოლიმპიადის მძლეოსნობის ესტაფეტის ფინალური შეხვედრა გაიმართა, რომელსაც განათლებისა და მეცნიერების მინისტრი თამარ სანიკიძე და სპორტისა და ახალგაზრდობის საქმეთა მინისტრი ლევან ყიფიანი დაესწრნენ. ღონისძიების ფარგლებში დაჯილდოვდნენ გამარჯვებული გუნდები.

განათლებისა და მეცნიერების სამინისტროს მხარდაჭერით, სპორტისა და ახალგაზრდობის საქმეთა სამინისტრო მასშტაბურ სასკოლო სპორტულ ოლიმპიადას ატარებს. ოლიმპიურ შეჯიბრებებში 11 ქალაქის - თბილისის, ბათუმის, მცხეთის, გორის, რუსთავის, თელავის, ახალციხის, ქუთაისის, ოზურგეთის, ზუგდიდის და ამბროლაურის სკოლების გუნდები არიან ჩართულნი. სასკოლო გუნდები ერთმანეთს სპორტის 4 სახეობაში - კალათბურთში, მაგიდის ჩოგბურთში, მინი ფეხბურთსა და მძლეოსნობაში ეჯიბრებიან.

ოლიმპიადა 15 მარტს მცხეთაში საზეიმოდ გაიხსნა, ხოლო ფინალური თამაშები დაგეგმილია ანაკლიის „მომავლის ბანაკში", სადაც სპორტულ შეჯიბრებებთან ერთად, კულტურული და გასართობი სანახაობაც გაიმართება. ფინალში გამარჯვებული გუნდები მონაწილეობას მიიღებენ 2016 წლის სასკოლო მსოფლიო ჩემპიონატებში, რომლებიც ხორვატიაში, ესტონეთში, ისრაელსა და უნგრეთში გაიმართება.

ოლიმპიადის შეჯიბრებები ტარდება საქართველოს ბავშვთა და მოსწავლე-ახალგაზრდობის სპორტის ეროვნული ფედერაციის სისტემითა და მოთხოვნებით, შეჯიბრებებში წარმოდგენილი სპორტის შესაბამისი სახეობების ეროვნული და საერთაშორისო ფედერაციების მოქმედი წესების მიხედვით და ოლიმპიადის საშეჯიბრო დებულების შესაბამისად.

მასშტაბური სასკოლო სპორტული ოლიმპიადა საქართველოში წელს პირველად ტარდება და პროექტს საპილოტე ხასიათი აქვს. მომავალი წლისთვის ოლიმპიადაში ყველა სკოლის ჩართვა იგეგმება. ოლიმპიადის სპონსორია კომპანია „IDS ბორჯომი საქართველო".