205 მანდატურს სერტიფიკატები გადაეცათ
საქართველოს განათლებისა და მეცნიერების
მინისტრმა დიმიტრი შაშკინმა და შსს აკადემიის რექტორმა ხატია დეკანოიძემ საჯარო სკოლების მომავალ
205 მანდატურს სერტიფიკატები გადასცეს. მანდატურები საქართველოს შინაგან
საქმეთა სამინისტროს აკადემიაში გადამზადდნენ, ისინი ეტაპობრივად სამი კვირის მანძილზე თეორიულ
მასალასთან ერთად, პრაქტიკულ უნარ-ჩვევებს ეცნობოდნენ და ფსიქოლოგიურ კურსს
გადიოდნენ.
სერტიფიცირებული მანდატურები ახალი
სასწავლო წლიდან თბილისის საჯარო სკოლებში
შევლენ და სკოლის შიდა განაწესს დაიცავენ.
მანდატურების პირველ საპილოტე ჯგუფში 21 მანდატური გადამზადდა და ისინი 2010 წლის 15 აპრილიდან, თბილისის შვიდ საპილოტე სკოლაში შევიდნენ. სამკაციანი ჯგუფი, დაკომპლექტებული ერთი ქალბატონისა და ორი მამაკაცისაგან სკოლაში კონფლიქტების, დანაშაულის პრევენციასა და ბავშვებისთვის ყველა სახის დახმარებას უზრუნველყოფდნენ.
მანდატურთა გადამზადების პროცესი მომავალშიც გაგრძელდება, ახალი სასწავლო წლის დაწყებამდე დაგეგმილია 740 მანდატურის გადამზადება. გარდა თბილისისა, სექტემბრიდან დაგეგმილია მანდატურების შესვლა ბათუმის, ქუთაისის, ზუგდიდის, ფოთის, რუსთავის, გორის საჯარო სკოლებში.
