მინისტრი ინფრასტრუქტურულ პროექტებს ეცნობა
საქართველოს განათლებისა და მეცნიერების მინისტრი თამარ სანიკიძე სოფელ ოკამის საჯარო სკოლაში ათასწლეულის გამოწვევის კომპაქტის ფარგლებში მიმდინარე სარეაბილიტაციო სამუშაოებს გაეცნო და სკოლის მასწავლებლებსა და მოსწავლეებს შეხვდა.
2015 წელს, სასწავლო გარემოს გაუმჯობესების მიზნით, ათასწლეულის გამოწვევის ფონდმა საქართველოს რეგიონებში საჯარო სკოლების სრული რეაბილიტაციის პროცესი დაიწყო. პირველი სარეაბილიტაციო სეზონი მცხეთა–მთიანეთის, შიდა ქართლის და სამცხე-ჯავახეთის რეგიონებში 30-მდე საჯარო სკოლას მოიცავს. მათ რიცხვშია 600 მოსწავლეზე გათვლილი კასპის რაიონის სოფელ ოკამის საჯარო სკოლაც, რომელიც რეაბილიტაციის შემდეგ ყველა თანამედროვე სტანდარტს დააკმაყოფილებს. ამჟამად სკოლაში 400-მდე მოსწავლე ირიცხება, მაგრამ რეაბილიტაციის შემდეგ, სკოლის დირექცია დარწმუნებულია მოსწავლეთა რაოდენობა მკვეთრად გაიზრდება. სკოლას სამი წელია სასკოლო ავტობუსიც ემსახურება.
ათასწლეულის კომპაქტის ფარგლებში, მომავალი ოთხი წლის მანძილზე საქართველოს რეგიონებში 100–მდე საჯარო სკოლის რეაბილიტაცია იგეგმება. ეს იმ სოფლების სკოლებია, სადაც კონტიგენტი დიდია და სკოლები გადაუდებელ რეაბილიტაციას საჭიოროებენ.
საჯარო სკოლების რეაბილიტაციის პროექტის სრული ბიუჯეტია 54 მლნ აშშ დოლარი. პროექტის შედეგად, 41 ათასზე მეტი ბენეფიციარისთვის გაუმჯობესდება სასწავლო გარემო და სწავლის ხელმისაწვდომობა.
