ბიზნესი მეცნიერებისა და ინოვაციების ფესტივალის მხარდასაჭერად
2016 წლის 17-25 სექტემბერს, მეცნიერებისა და ინოვაციების ფესტივალი გაიმართება. ფესტივალის მიზანია სამეცნიერო კვლევებისა და ინოვაციების ხელშეწყობა, ქვეყნის სამეცნიერო პოტენციალის წარმოჩენა, საერთაშორისო გამოცდილების გაზიარება… ფესტივალის ფარგლებში წარმოდგენილი იქნება სხვადასხვა ქვეყანის მეცნიერების დღე, მოეწყობა ბირთვული კვლევების ევროპული ცენტრის (CERN) გამოფენა და სხვა ღონისძიებები.
ფესტივალის მაღალ დონეზე ჩატარების უზრუნველყოფისთვის, საქართველოს განათლებისა და მეცნიერების სამინისტრო აქტიურად თანამშრომლობს სხვადასხვა უწყებასთან, სამეცნიერო სფეროს წარმომადგენლებთან როგორც საქართველოში ისე, საზღვარგარეთ. ფესტივალის ფარგლებში თანამშრომლობის საკითხზე მსჯელობის, მხარდაჭერისა და დამატებითი რესურსების მოძიების მიზნით, მინისტრი ალექსანდრე ჯეჯელავა ბიზნეს სექტორისა და იმ კომპანიების წარმომადგენლებს შეხვდა, ვინც სამეცნიერო/ინოვაციური მიმართულებით წარმატებულია. ამ კომპანიებს გარდა მატერიალური მხარდაჭერისა, თავადაც ექნებათ შესაძლებლობა ფესტივალზე წარმოადგინონ თავიანთი მიღწევები.
მინისტრი დარწმუნებულია ფესტივალს ბიზნეს სექტორიდანაც ძალზე მასშტაბური მხარდაჭერა ექნება და მიღებული დამატებითი რესურსები მეცნიერების პოპულარიზაციას მოხმარდება.
