მომავლის ბანაკში ზაფხული 2 300-ზე მეტმა მოზარდმა გაატარა
საქართველოს განათლებისა და მეცნიერების მინისტრი ალექსანდრე ჯეჯელავა და სპორტისა და ახალგაზრდობის საქმეთა მინისტრის მოადგილე რევაზ ჯაველიძე ანაკლიაში „მომავლის ბანაკს" ეწვივნენ. ბანაკი სპორტისა და ახალგაზრდობის საქმეთა სამინისტროს „ბავშვთა და ახალგაზრდობის ეროვნული ცენტრის“ ყველაზე მასშტაბური პროექტია, რომელსაც ცენტრი მეოთხე წელია განათლებისა და მეცნიერების სამინისტროს მხარდაჭერით ახორციელებს.
პროგრამის მიზანია სხვადასხვა სახის კულტურულ-საგანმანათლებლო და გასართობ-შემეცნებითი ღონისძიებების საშუალებით, მაღალი აკადემიური მოსწრების, სოციალურად დაუცველი, იძულებით გადაადგილებული და მრავალშვილიანი ოჯახების, ეთნიკური უმცირესობების, მაღალმთიანი და საზღვრისპირა რეგიონებში მცხოვრები, განათლებისა და მეცნიერების სამინისტროს მიერ ორგანიზებულ კონკურსებსა და ოლიმპიადებში გამარჯვებული მოსწავლეების აქტიური დასვენებით უზრუნველყოფა, მათთვის არაფორმალური განათლების მიღების შესაძლებლობა, ინტელექტუალური პოტენციალის ამაღლება, სოციალური ინტეგრაციის, ჯანსაღი ცხოვრების წესის პოპულარიზაცია და საქართველოში მცხოვრები ეთნიკური უმცირესობების ინტეგრაციის ხელშეწყობა.
ღონისძიების დასაწყისში ალექსანდრე ჯეჯელავა „მომავლის ბანაკის“ ინფრასტრუქტურას გაეცნო. შემდეგ, ბანაკის 14-18 წლის მოზარდებს საკონფერენციო დარბაზში შეხვდა და ვრცელი სიტყვით მიმართა, შეხვედრა კითხვა-პასუხის რეჟიმში გაგრძელდა. საღამოს სტუმრები 12 გუნდის წარდგენასა და წინასწარ კენჭისყრით განსაზღვრული ქვეყნების წარმოჩენით, ოლიმპიადის საზეიმო გახსნას დაესწრნენ.
