ალექსანდრე ჯეჯელავა ფხვენისის რეაბილიტირებულ სკოლას ეწვია
განათლებისა და მეცნიერების მინისტრი ალექსანდრე ჯეჯელავა დღეს, ათასწლეულის გამოწვევის კორპორაციის მეორე კომპაქტის ფარგლებში რეაბილიტირებულ ფხვენისის საჯარო სკოლას ეწვია. ალექსანდრე ჯეჯელავამ, ათასწლეულის გამოწვევის ფონდის აღმასრულებელმა დირექტორმა მაგდა მაღრაძემ და აშშ-ის ათასწლეულის გამოწვევის კორპორაციის საქართველოს წარმომადგენლობის დირექტორმა ჯენერ ედელმანმა დაათვალიერეს სკოლაში დასრულებული სამუშაოები. აღნიშნულ სკოლაში შესრულდა 1500 კვადრატული მეტრის ფართობის რეკონსტრუქცია/რეაბილიტაცია და შეძლებს, მიიღოს 240 მოსწავლე, ორ ცვლაში.
2016 წელს ათასწლეულის გამოწვევის ფონდმა, საჯარო სკოლების ინფრასტრუქტურის განვითარების პროექტის ფარგლებში, დაასრულა 12 საჯარო სკოლის სრული რეაბილიტაცია. პროექტის ფარგლებში განხორციელდა ბებნისის, გორის #5, ზერტის, თიანეთის #1, ოკამის, საქაშეთის, სკრის, ტინისხიდის, ტყვიავის, ფხვენისის, ძეგვისა და ხიდისთავის საჯარო სკოლების საერთო სარგებლობის ობიექტებისა და კომუნიკაციების რეკონსტრუქცია და რეაბილიტაცია.
პირველი სარეაბილიტაციო სეზონი მცხეთა–მთიანეთის, შიდა ქართლის და სამცხე-ჯავახეთის რეგიონებში 30-მდე საჯარო სკოლას მოიცავს, ხოლო 100–მდე საჯარო სკოლის რეაბილიტაცია იგეგმება საქართველოს სხვადასხვა რეგიონში.
პროექტი ხორციელდება აშშ-ის ათასწლეულის გამოწვევის კორპორაციის მეორე კომპაქტის დაფინანსებით, განათლებისა და მეცნიერების სამინისტროსთან და სსიპ საგანმანათლებლო და სამეცნიერო ინფრასტრუქტურის განვითარების სააგენტოსთან თანამშრომლობით.
