საგანმანათლებლო რესურსების ფესტივალი

საქართველოს განათლებისა და მეცნიერების სამინისტრო დაინტერესებულ პირებს იწვევს მონაწილეობა მიიღონ ინტერესთა გამოხატვის პროცესში, რომელიც სკოლამდელი და სასკოლო საგანმანათლებლო რესურსების ფესტივალში მონაწილეობას ეხება, კერძოდ: არაუგვიანეს მიმდინარე წლის 31 ივლისისა, ფესტივალში მონაწილეობის მსურველმა (პირმა, ორგანიზაციამ..) სამინისტროს ელ. ფოსტაზე: [email protected] უნდა გამოაგზავნოს შემდეგი ინფორმაცია:

1. დაინტერესება საგანმანათლებლო რესურსების ფესტივალში მონაწილეობის მიღებაზე;

2. საგამოფენო ექსპონატების განსათავსებლად საჭირო ფართის ოდენობა (კვ.მ);

3. ექსპონატების სახეები.

აღნიშნული ფესტივალი მიზნად ისახავს ბაგა-ბაღებისა და სკოლებისათვის, ბავშვების/მოსწავლეების, მათი მშობლების, აღმზრდელ-პედაგოგებისა და მასწავლებლებისათვის მრავალფეროვანი საგანმანათლებლო რესურსების შესახებ ინფორმაციის ერთიან სივრცეში განთავსებასა და მათი გაცნობის ხელმისაწვდომობის უზრუნველყოფას.

ფესტივალის ფარგლებში ნებისმიერ დაინტერესებულ პირს საშუალება ექნება საგამოფენო ექსპონატის სახით წარმოადგინოს: მულტიმედიური ტექნოლოგიები, 3D დისპლეი/მოწყობილობები, აუდიო/ვიდეო ტექნიკა, ციფრული კამერები, მონიტორები, პროექტორები, მოდელები, ხელსაწყოები, პლაკატები, ბარათები, თვალსაჩინოებები, საგანმანათლებლო თამაშები, შემეცნებითი ფილმები, სხვადასხვა სასწავლო ინვენტარი (მათ შორის, სპორტული) და ტექნიკა, ატლასები, გლობუსები, რუკები, ლაბორატორიული აღჭურვილობები, სხვადასხვა საკითხავი მასალები, ჟურნალები, ენციკლოპედიები, ლექსიკონები, ცნობარები, ელექტრონული რესურსები და სხვა, სააღმზრდელო და სასწავლო მიზნებთან შესაბამისი საგანმანათლებლო რესურსები.

ფესტივალის გამართვა დაგეგმილია მიმდინარე წლის შემოდგომით (სექტემბერი/ოქტომბერი) საქართველოს 8 ქალაქში: თბილისი, ბათუმი, ზუგდიდი, ქუთაისი, ბორჯომი, გორი, მარნეული და თელავი.

საგამოფენო ექსპონატების განსათავსებლად სამინისტრო ფესტივალის თითოეულ მონაწილეს უფასოდ გამოუყოფს ფიქსირებულ ფართს.