ენობრივი საკითხები საერთაშორისო სამეცნიერო კონფერენციაზე განიხილეს
საქართველოს განათლებისა და მეცნიერების სამინისტროს მიერ ორგანიზებული „მეცნიერებისა და ინოვაციების ფესტივალი - 2017-ის“ ფარგლებში 27-29 სექტემბერს საქართველოს საპატრიარქოს წმინდა ანდრია პირველწოდებულის სახელობის ქართული უნივერსიტეტში ტარდება VIII საერთაშორისო სამეცნიერო კონფერენცია თემაზე: „ენობრივი სიტუაცია კავკასიაში“. კონფერენციის პროგრამა მრავალფეროვანია. მასში მონაწილეობენ როგორც ქართველი, ასევე უცხოელი მეცნიერები ვაშინგტონის, პოზნანის, მაჰაჩყალის, დუზჯეს სამეცნიერო ცენტრებიდან. განსაკუთრებით უნდა აღინიშნოს თურქეთიდან დუზჯეს უნივერსიტეტის დელეგაციის სტუმრობა უნივერსიტეტის რექტორის ხელმძღვანელობით. დუზჯეს უნივერსიტეტის რექტორი, პროფესორი ნიგარ დემირჯან ჩაქარი წარმოშობით ქართველია და დღეს იგი ქართულად მიესალმა კონფერენციის მონაწილეებს.
საგულისხმოა, რომ თურქეთის არაერთ უნივერსიტეტში ისწავლება ქართული ენა და ლიტერატურა. დუზჯეს უნივერსიტეტში ოთხი წლის წინ გაიხსნა ქართული ენისა და ლიტერატურის სპეციალობის საბაკალავრო პროგრამა. ამჟამად კი ამოქმედდა მაგისტრატურაც. დუზჯეს რეგიონში, სადაც მრავლად არიან მუჰაჯირი ქართველების შთამომავლები, ქართული ენისა და ლიტერატურის სწავლება საუნივერსიტეტო დონეზე, ერთობ მისასალმებელი და დასაფასებელია. საყურადღებო ფაქტია, რომ ქალბატონი ნიგარ დემირჯან ჩაქარის მხარდაჭერით წელს მაისში დუზჯეს უნივერსიტეტში წარმატებით ჩატარდა შოთა რუსთაველის 850 წლისთავისადმი მიძღვნილი სამეცნიერო კონფერენცია.
