ზუგდიდის სკოლებში მანდატურები შევიდნენ

უსაფრთხო სკოლის კონცეფციის ფარგლებში ზუგდიდის ყველა საჯარო სკოლაში მანდატურები შევიდნენ.  საქართველოს განათლებისა და მეცნიერების მინისტრის მოადგილე ირინე ქურდაძემ  ზუგდიდის №2 საჯარო სკოლაში მანდატურთა სამკაციანი ჯგუფი  წარადგინა.

ზუგდიდის  №1, № 2, №3, №4, №5 და №10  სკოლებში მანდატურები   შევიდნენ. ისინი ეტაპობრივად ზუგდიდის  ყველა საჯარო სკოლას მოიცავენ.

სკოლებში უსაფრთხოების დაცვის მიზნით, მანდატურები ახალი სასწავლო წლიდან თბილისის,  ბათუმის, ქუთაისის და ზუგდიდის   საჯარო სკოლებში  შევიდნენ. წლის ბოლომდე მანდატურის ინსტიტუტი ამოქმედდება  გორის და რუსთავის ყველა საჯარო სკოლაში. სამკაციანი ჯგუფი, რომლის შემადგენლობაშიც ერთი ქალბატონია, უსაფრთხო სკოლის პროგრამის ფარგლებში გადამზადდა პოლიციის აკადემიაში. ისინი სრულად ფლობენ იმ უნარ-ჩვევებს, რაც სკოლაში კონფლიქტების მოგვარებაში დაეხმარებათ. მანდატურების ფუნქცია დანაშაულის პრევენცია და ბავშვისთვის ყველა სახის დახმარების გაწევაა. მათ სადამსჯელო ღონისძიებების განხორციელება ეკრძალებათ და ვალდებულნი არიან მოსწავლეთა უსაფრთხოებაზე იზრუნონ.

სპეციალური ფორმითა და თანამედროვე საკომუნიკაციო საშუალებებით აღჭურვილი მანდატურები საგანგებოდ მათთვის  გამოყოფილ ოთახებში განთავსდებიან. უსაფრთხო სკოლის პროგრამის ფარგლებში განხორციელებული  ახალი ინიციატივის მიზანია, სწავლის პერიოდში მშობლებს  შვილების უსაფრთხოების სრული გარანტია ჰქონდეთ.