კავკასიის უნივერსიტეტში დიპლომების გადაცემის ცერემონია გაიმართა
განათლების, მეცნიერების, კულტურისა და სპორტის მინისტრი, მიხეილ ბატიაშვილი, კავკასიის უნივერსიტეტის კურსდამთავრებულებისთვის დიპლომების გადაცემის ცერემონიას პროფესორ-მასწავლებლებთან და საპატიო სტუმრებთან ერთად უნივერსიტეტის ახალ კორპუსში დაესწრო.
„თქვენი დაუზარელი შრომით და იმ ცოდნით, რომელიც უკვე გაქვთ უნდა მიაღწიოთ მიზანს. მიღებულ ცოდნასთან ერთად აუცილებელია გჯეროდეთ, რომ ყველაფერი შესაძლებელია. მინდა გთხოვოთ, რომ გაუფრთხილდეთ ურთიერთობებს. თქვენი მომავალი წარმატებისთვის ცოდნასთან ერთად განმსაზღვრელია თქვენი კავშირები. თქვენ კიდევ ბევრჯერ შეხვდებით და დაეხმარებით ერთმანეთს და შესაძლოა გახდეთ ერთმანეთის საუკეთესო საქმიანი პარტნიორები. ნებისმიერი წარმატება, ნებისმიერი კარიერული წინსვლა მუდმივი განათლების გარეშე წარმოუდგენელია. ყოველი დღე არის ცოდნის მიღება, ბრძოლა, ერთმანეთის გვერდით დგომა და ეს ყველაფერი განაპირობებს თქვენ მომავალ წარმატებას.” - მიმართა კავკასიის უნივერსიტეტის კურსდამთავრებულებს მიხეილ ბატიაშვილმა.
