„Rustaveli-DAAD“-ის ერთობლივი სასტიპენდიო პროგრამის შემაჯამებელი კონფერენცია
საქართველოს განათლების, მეცნიერების, კულტურისა და სპორტის მინისტრის მოადგილე, ნუნუ მიცკევიჩი, შოთა რუსთაველის საქართველოს ეროვნული სამეცნიერო ფონდისა და გერმანიის აკადემიური გაცვლის სამსახურის (DAAD) მიერ ორგანიზებულ შემაჯამებელ კონფერენციას „Rustaveli-DAAD-ის ერთობლივი სასტიპენდიო პროგრამა: პროექტების პრეზენტაცია“ დაესწრო და საზოგადოებას სიტყვით მიმართა. ღონისძიებას, რომელიც საქართველოს პრეზიდენტმა სალომე ზურაბიშვილმა გახსნა, DAAD-ის თბილისის საინფორმაციო ცენტრის ხელმძღვანელი გებჰარდ როილი და საქართველოში გერმანიის ფედერაციული რესპუბლიკის საელჩოს კულტურის ატაშე ბარბარა დე ჩაშელიც ესწრებოდნენ.
კონფერენციის ფარგლებში „Rustaveli-DAAD“-ის სასტიპენდიო პროგრამის 2019 წლის საგრანტო კონკურსის გამარჯვებული პროექტების პრეზენტაცია გაიმართა და თემატური პოსტერები გამოიფინა.
სიტყვით გამოსვლისას მინისტრის მოადგილე ნუნუ მიცკევიჩმა აღნიშნა, რომ სამინისტროსთვის ერთ-ერთი პრიორიტეტია სამეცნიერო მიმართულების ინტერნაციონალიზაცია. მისი თქმით, პროგრამის ფარგლებში გამარჯვებული ახალგაზრდები საუკეთესო მაგალითია მეცნიერების ინტერნაციონალიზაციისა და ახალგაზრდა მეცნიერების მხარდაჭერისა. „Rustaveli-DAAD“-ის სასტიპენდიო პროგრამის საშუალებით მათ მიეცათ შესაძლებლობა, მეტი კონტაქტი ჰქონდეთ უცხოელ კოლეგებთან და გაეცნონ უახლეს ტექნოლოგიებსა და მეთოდოლოგიებს. მნიშველოვანია ისიც, რომ ახალგაზრდა მეცნიერების ცოდნა და უნარ-ჩვევები მომავალში ჩვენი ქვეყნის კეთილდღეობას მოხმარდეს.
„Rustaveli-DAAD“-ის სასტიპენდიო პროგრამის მიზანია, ხელი შეუწყოს ახალგაზრდა მეცნიერებისა და დოქტორანტების სამეცნიერო-კვლევითი პოტენციალის განვითარებას, საერთაშორისო საგანმანათლებლო და სამეცნიერო სივრცეში ინტეგრირებას, ხარისხიანი სადოქტორო განათლების მიღებასა და საერთაშორისო სამეცნიერო თანამშრომლობის გაღრმავებას.
