დიდ ჯიხაიშში ნიკო ნიკოლაძის დაარსებული სასწავლებელი ახალ სიცოცხლეს იწყებს
სამტრედიის მუნიციპალიტეტის სოფელ დიდ ჯიხაიშში, ნიკო ნიკოლაძის მიერ დაარსებული სასწავლებელის სრული რეაბილიტაცია განხორციელდება.
განათლების, მეცნიერების, კულტურისა და სპორტის მინისტრის მოადგილემ, თამარ ქიტიაშვილმა და იმერეთის რწმუნებულმა, ზვიად შალამბერიძემ ისტორიული სასწავლებელი დაათვალიერეს და მისი რეაბილიტაციის პროექტს გაეცნენ.
სარეაბილიტაციო სამუშაოები შემოდგომაზე დაიწყება, რომლის დასრულების შემდეგ, ჯიხაიშში დასავლეთ საქართველოში ყველაზე მასშტაბური აგრარული პროფილის კოლეჯი ამოქმედდება.
მოეწყობა თანამედროვე სასწავლო ბაზები, დაინერგება საერთაშორისო გაცვლითი პროგრამები, კერძო სექტორთან მჭიდრო თანამშრომლობით შეიქმნება სოფლის მეურნეობის დარგში ახალი ცოდნის გავრცელების მექანიზმები.
დიდ ჯიხაიშში სასოფლო-სამეურნეო სასწავლებელი დიდი ქართველი მოაზროვნის, პუბლიცისტისა და საზოგადო მოღვაწის ნიკო ნიკოლაძის თაოსნობით, 1925 წელს დაარსდა. არსებობის 95 წლის მანძილზე სასწავლებელმა სახელოვანი და ნაყოფიერი გზა განვლო, თუმცა 90-იან წლებში ქვეყანაში შექმნილმა მძიმე ვითარებამ, ისტორიულ სასწავლებელსაც მძიმე დაღი დაასვა.
დაწესებულება 2016 წლიდან საქართველოს ტექნიკური უნივერსიტეტის აგრარული მეცნიერებების და ბიოსისტემების ინჟინერიის ფაკულტეტის დაქვემდებარებაშია.
სწორედ ტექნიკური უნივერსიტეტის მიერ მომზადდა დიდი ჯიხაიშის ინფრასტრუქტურის განვითარების გეგმა, რომელიც პირველ ეტაპზე, განათლების სამინისტროს მხარდაჭერით, სასწავლო კორპუსის სრულ რეაბილიტაციას გულისხმობს.
