მინისტრმა ბიბლიოთეკის ახალი კორპუსი და სასწავლო ლაბორატორიები გახსნა
ბიბლიოთეკის თანამედროვე მოთხოვნების შესაბამისი სამკითხველო თუ საკონფერენციო დარბაზები უახლესი ტექნოლოგიებითაა აღჭურვილი. ახალი ბიბლიოთეკის მდიდარი წიგნადი ფონდი, ანბანური ელექტრონული და სისტემატური კატალოგები სტუდენტებს კომფორტული და შეუფერხებელი მუშაობის საშუალებას სთავაზობს.
სამართლის ფაკულტეტზე გახსნილ კრიმინალისტიკურ ლაბორატორიაში სტუდენტები კრიმინალისტიკური ტექნიკის, საგამოძიებო ტაქტიკისა და ცალკეული სახის დანაშაულთა გამოძიების ისეთ უმნიშვნელოვანეს საკითხებს დაეუფლებიან, როგორიცაა კვალთა და სხვა მტკიცებულებათა გამოვლენა, ფიქსირება და გამოკვლვა.
მომავალ ჟურნალისტებს კი, პრაქტიკული მეცადინეობები ამიერიდან სტუდიაში ჩაუტარდებათ. ახლადგახსნილი სატელევიზიო-სამაუწყებლო ლაბორატორიის სტუდია-პავილიონი ნებისმიერი ფორმატის სატელევიზიო გადაცემების მომზადების, ჩაწერისა და პირდაპირ ეთერში გასვლის საშუალებას იძლევა.
გურამ თავართქილაძის სასწავლო უნივერსიტეტის აკადემიური პერსონალი, კვალიფიციურ სპეციალისტებთან ერთად, თეორიული ცოდნის პარალელურად, სტუდენტთა უნარ-ჩვევების გამომუშავებასა და პრაქტიკული ცოდნის დაუფლებაზეც ზრუნავს.
დიმიტრი შაშკინის განცხადებით, სამინისტრო ყოველთვის მიესალმება და მომავალშიც მხარს დაუჭერს სასწავლო დაწესებულებათა ინიციატივას - იზრუნონ არა მარტო სასწავლო პროგრამების სრულყოფაზე არამედ, შექმნან თანამედროვე და კომფორტული სასწავლო ინფრასტრუქტურა.
