ზვიად გაბისონია ზაარლანდის ფედერალური მიწის ეკონომიკის, ინოვაციების, ციფრული განვითარებისა და ენერგეტიკის მინისტრის მოადგილეს შეხვდა
საქართველოს განათლების, მეცნიერებისა და ახალგაზრდობის მინისტრის მოადგილე ზვიად გაბისონიამ გერმანიაში ზაარლანდის ფედერალური მიწის ეკონომიკის, ინოვაციების, ციფრული განვითარებისა და ენერგეტიკის მინისტრის მოადგილე ელენა იორგოვას-რამანაუსკასთან სამუშაო შეხვედრა გამართა.
მხარეებმა საქართველოსა და ზაარლანდს შორის განათლების სფეროში თანამშრომლობის პერსპექტივები განიხილეს და პარტნიორობის გაფართოების შესაძლებლობებზე იმსჯელეს.
საუბარი შეეხო ისეთ მნიშვნელოვან საკითხებს, როგორებიცაა: სამეცნიერო მიღწევების პრაქტიკაში დანერგვის ხელშეწყობა, მეცნიერებასა და ბიზნესს შორის კავშირების გაღრმავება, ცოდნისა და სამეცნიერო პოტენციალის მნიშვნელობა ქვეყნის ეკონომიკურ განვითარებაში, ციფრული მმართველობის მიმართულებით გამოცდილების გაზიარება.
შეხვედრის დასასრულს მხარეებმა სამომავლო თანამშრომლობის გაღრმავებისა და ერთობლივი ინიციატივების განხორციელების მზადყოფნა დაადასტურეს.
შეხვედრას ქალაქ მაინის ფრანკფურტში საქართველოს გენერალური კონსული გიორგი ხუბუა ესწრებოდა.
