თამარ მახარაშვილმა მედიაწიგნიერების ფორუმში მიიღო მონაწილეობა
საქართველოს განათლების, მეცნიერებისა და ახალგაზრდობის მინისტრის მოადგილე თამარ მახარაშვილმა მონაწილეობა მიიღო კომუნიკაციების კომისიის ორგანიზებით გამართულ მედიაწიგნიერების ფორუმში - „თითოეულის როლი მნიშვნელოვანია - მედიაწიგნიერება ყველასთვის“.
ფორუმი UNESCO-ს მედია და ინფორმაციული წიგნიერების გლობალური კვირეულის ფარგლებში გაიმართა. მისი მიზანი მედიაწიგნიერების მნიშვნელობის წარმოჩენა, სხვადასხვა სექტორს შორის თანამშრომლობის გაძლიერება და გამოცდილების გაზიარება იყო.
ღონისძიების ფარგლებში მონაწილეებმა მედიაწიგნიერების ფორმალურ განათლებაში ინტეგრირების, კრიტიკული აზროვნების განვითარების, დეზინფორმაციის ამოცნობისა და ციფრული უსაფრთხოების საკითხებზე იმსჯელეს. განსაკუთრებული ყურადღება დაეთმო მედიაწიგნიერების ახალი ეროვნული სტანდარტისა და გზამკვლევის წარდგენას.
მედიაწიგნიერების განვითარება თანამედროვე განათლების მნიშვნელოვანი მიმართულებაა, რომელიც მოსწავლეებს ინფორმაციის კრიტიკულად გააზრებაში, გადამოწმებასა და ციფრულ გარემოში პასუხისმგებლიან მოქმედებაში ეხმარება.
ღონისძიებაში მონაწილეობდნენ საქართველოს პარლამენტის განათლების, მეცნიერებისა და ახალგაზრდულ საქმეთა კომიტეტის თავმჯდომარე მარიამ ლაშხი, კომუნიკაციების კომისიის თავმჯდომარე გოგა გულორდავა, საქართველოში გაეროს ბავშვთა ფონდის (UNICEF) წარმომადგენლის მოადგილე ალექსანდრუ ნარტეა, კომუნიკაციების კომისიის წევრი ნათია კუკულაძე და სხვა მოწვეული სტუმრები.
