მინისტრი მას-მედიის წარმომადგენლებს შეხვდა

საქართველოს განათლებისა და მეცნიერების მინისტრი დიმიტრი შაშკინი გუდაურში მას-მედიის წარმომადგენლებს შეხვდა და მათ განხორციელებული სიახლეები  და ახალი სამოქმედო გეგმა გააცნო. 

სემინარზე წარმოდგენილი  პრეზენტაცია განათლების ყველა სფეროს მოიცავდა. მინისტრმა განსაკუთრებული აქცენტი რამდენიმე მნიშვნელოვან სიახლეზე გააკეთა, კერძოდ, მომავალი წლისთვის VII-XII კლასებში ახალი ეროვნული სასწავლო გეგმა ამოქმედდება და ამ კლასებისთვის  ახალი სახელმძღვანელოები შეიქმნება, რომელთა ფასი 10 ლარს არ აღემატება; სკოლებში საინფორმაციო ტექნოლოგიების, ზუსტი და საბუნებისმეტყველო საგნების სწავლება გაძლიერდება; ასი ახალი ,,მომავლის კლასი” გაიხსნება, სკოლები ,,ჭკვიანი დაფებით” აღიჭურვება; პროგრამა ”აინშტაინი”-ს ფარგლებში  სკოლებში ახალი ლაბორატორიები  გაიხსნება.

გაძლიერდება ინგლისური ენის სწავლება და პროექტის ”ასწავლე და ისწავლე საქართველოსთან ერთად” ფარგლებში, 1500 ინგლისურენოვანი მასწავლებელი ჩამოვა; ადგილობრივი 300 ინგლისური ენის მცოდნე მოხალისე ქვემო ქართლის, სამცხე-ჯავახეთისა და სხვა მაღალმთიანი რეგიონის სკოლებში ინგლისური ენის მასწავლებლად იმუშავებს; გაიზრდება ეთნიკური უმცირესობებისათვის განათლების ხელმისაწვდომობა და გაგრძელდება პროექტი ”ქართული ენა მომავალი წარმატებისთვის”.

გადამზადდებიან პედაგოგები; გაგრძელდება პედაგოგთა ხელფასების ზრდა; გაფართოვდება მანდატურის სამსახური და იგი წელს სკოლის მანდატურის საერთაშორისო ასოციაციის წევრი გახდება; გაგრძელდება ინკლუზიური განათლების განვითარება; საკვირაო  და კერძო სკოლების ხელშეწყობა;

 მსოფლიოს წამყვან უნივერსიტეტებში სამაგისტრო პროგრამების დაფინანსება გაგრძელდება, ამოქმედდება სტუდენტური დასაქმების პროგრამა, რომელიც საზაფხულო არდადეგებზე 25 000 სტუდენტის საზაფხულო   სამუშაოებზე დასაქმებას გულისხმობს.

 2012 წლის ბიუჯეტში სასკოლო ინფრასტრუქტურის გაუმჯობესებისთვის 40 მილიონი ლარია გათვალისწინებული, აშენდება 20 ახალი სკოლა; სკოლებს გადაეცემათ  100 000 ახალი მერხი; 5000 ახალი დაფა და 25 000 კომპიუტერი.

2012 წლისთვის აშენდება: მასწავლებლის სახლები ქუთაისში, ბათუმსა და ზუგდიდში, 3 ახალი პროფესიული სასწავლებელი (თბილისი, ოზურგეთი, ქობულეთი), 2 ახალი საინფორმაციო ცენტრი (თელავი, ზუგდიდი), სონის პროფესიული კოლეჯი, ტექნოლოგიური უნივერსიტეტი ბათუმში, მოხდება ხელნაწერთა ინსტიტუტის რეაბილიტაცია.

გაგრძელდება პროფესიული და უმაღლესი  განათლების ხელშეწყობა,  მეცნიერების განვითარება და პოპულარიზაცია. სამეცნიერო კვლევებისთვის მომავალი წლის ბიუჯეტში 37 მილიონი ლარია გათვალისწინებული.

ეს არის არასრული ჩამონათვალი სამომავლოდ დაგეგმილი სიახლეებისა, რომელთან დაკავშირებითაც საქართველოს განათლებისა და მეცნიერების მინისტრმა დიმიტრი შაშკინმა მას-მედიის წარმომადგენელთა შეკითხვებსაც უპასუხა.

Video