ახალი პროექტი ამერიკული კულტურით დაინტერესებული მოსწავლეებისათვის
საქართველოს
განათლებისა და მეცნიერების სამინისტროსა და ამერიკის საელჩოს
მხარდაჭერით, თბილისის მერიის მთავარ ბიბლიოთეკაში ამერიკისმცოდნეობის ზოგადი
კურსი შეიქმნა, რომელიც ორიენტირებულია ამერიკული
კულტურით, საზოგადოებითა და ისტორიით დაინტერესებულ სკოლის მოსწავლეებზე. კურსის ამოქმედება საქართველო-ამერიკის ორმხრივი ურთიერთობის 20
წლისთავს მიეძღვნა.
პროექტის ფარგლებში თბილისის საჯარო სკოლების მოსწავლეები საქართველო-ამერიკის ურთიერთობის ისტორიას, ამერიკის პოლიტიკას, ხელოვნებასა და ლიტერატურას გაეცნობიან. აგრეთვე აღნიშნული პროექტი დაეხმარება მოსწავლეებს ანალიტიკურად შეაფასონ საქართველო-ამერიკის ურთიერთობები, გაეცნონ ამერიკულ ფასეულობებს, ცხოვრების წესსა და ტრადიციებს.
პროექტში მონაწილეობას იღებენ თბილისის ივანე ჯავახიშვილის სახ. სახელმწიფო უნივერსიტეტის ამერიკისმცოდნეობის ფაკულტეტის მიმართულების საბაკალავრო პროგრამის სტუდენტები და შავი ზღვის საერთაშორისო უნივერსიტეტიდან მოწვეული ამერიკისმცოდნეობის ფაკულტეტის მაგისტრანტები.
პროექტის პრეზენტაციას სხვა მოწვეულ სტუმრებთან ერთად, საქართველოს განათლებისა და მეცნიერების მინისტრის მოადგილე ნოდარ სურგულაძე დაესწრო.
