ათი ქართველი მოსწავლე ერთი წლით დიდ ბრიტანეთში გაემგზავრება
HMC Projects არის წამყვანი დამოუკიდებელი საქველმოქმედო ორგანიზაცია გაერთიანებულ სამეფოში, რომლის მთავარი მიზანია, საშუალება მისცეს მოსწავლეებსა და მასწავლებლებს ცენტრალური და აღმოსავლეთ ევროპის ქვეყნებიდან, ისწავლონ, ასწავლონ და დაამყარონ კონტაქტები თავიანთ ბრიტანელ თანატოლებთან და კოლეგებთან, მნიშვნელოვნად გაიუმჯობესონ ინგლისური ენის ცოდნის დონე და აიმაღლონ კვალიფიკაცია. ამ დროისთვის, უკვე 1200-ზე მეტმა კანდიდატმა მიიღო 100%-იანი სტიპენდია ბრიტანულ სკოლებში ერთწლიანი კურსის გასავლელად.
2012 წელს, HMC პროექტების ჯგუფმა თანამშრომლობის ხელშეკრულება კომპანია “Unique Learning”- თან გააფორმა, რომელიც ამ ორგანიზაციის ერთადერთი წარმომადგენელია საქართველოში და მისი სახელით აწყობს გაცნობით შეხვედრებს და ორგანიზებას უწევს პროექტის განხორციელებას.
კომპანია “Unique Learning” არ მონაწილეობს სტიპენდიანტების შერჩევის პროცესში. გამარჯვებულ კანდიდატებს ტესტირების, გასაუბრების და მათი აკადემიური მოსწრების საფუძველზე, HMC -ის წარმომადგენლები არჩევენ.
