სამოქალაქო განათლების ხელშეწყობის პროექტი ამოქმედდება
პროექტის „საჯარო სკოლებში სამოქალაქო განათლების ხარისხიანი სწავლების ხელშეწყობა“ მიზანია, სამოქალაქო საზოგადოების როლის გაძლიერება სამოქალაქო მონაწილეობის ხელშეწყობის და შესაბამისი უნარების განვითარების გზით, საქართველოს საჯარო სკოლებში სამოქალაქო განათლების საგნის სწავლით მოზარდთა დაინტერესება და სწავლა/სწავლების პროცესის გაუმჯობესება.
პროექტის ამოცანებია:
- სამოქალაქო განათლების პედაგოგებისთვის დამატებითი ინფორმაციისა და მეთოდური საშუალებების მიწოდება;
- სამოქალაქო განათლების პედაგოგებს შორის კონტაქტების გაღრმავება და არსებული გაერთიანებების ხელშეწყობა;
- სამოქალაქო განათლების ლობირება და შესაბამისი პოლიტიკის მხარდაჭერა.
პროექტის ფარგლებში დაგეგმილია ტრენინგები სამოქალაქო განათლების პედაგოგებისათვის. ასევე, ქართველი და გერმანელი ექსპერტები განათლებისა და მეცნიერების სამინისტროს წარმომადგენლებთან ერთად იმუშავებენ მეთოდოლოგიურ სახელმძღვანელო დოკუმენტებზე, მოეწყობა მრგვალი მაგიდები და თემატური კონფერენციები.
პროექტი სამცხე-ჯავახეთის, შიდა ქართლის, ქვემო ქართლის, მცხეთა-მთიანეთის, იმერეთის, აჭარისა და კახეთის რეგიონების სკოლებში განხორციელდება.
პროექტი თანადაფინანსებულია ევროკავშირისა და კონრად ადენაუერის ფონდის მიერ. პროექტს ახორციელებს კონრად ადენაუერის ფონდი საქართველოს ტრენერ პედაგოგთა კავშირ „ლამპართან“ თანამშრომლობით.
