მასწავლებლის სახლში ფრანკოფონიის საერთაშორისო დღე აღინიშნა
მასწავლებლის სახლში ფრანგული ენისა და ფრანკოფონიის საერთაშორისო დღე აღინიშნა. საქართველოს ფანგული ინსტიტუტის მიერ ორგანიზებული ღონისძიება საფრანგეთის ელჩმა საქართველოში რენო სალენსმა, განათლებისა და მეცნიერების მინისტრის მოადგილემ ლია გიგაურმა და მასწავლებელთა პროფესიული განვითარების ეროვნული ცენტრის დირექტორმა გია მამულაშვილმა გახსნეს.
ღონისძიებაზე ფრანკოფონიის საერთაშორისო დღეების ფარგლებში გამართული კონკურსების გამარჯვებულები საქართველოს ფრანგული ინსტიტუტის დირექტორმა ჟილ კარასომ დააჯილდოვა. გარდა ამისა, საქართველოს განათლებისა და მეცნიერების სამინისტროს მასწავლებელთა პროფესიული განვითარების ეროვნულმა ცენტრმა უკვე მეორედ გამოავლინა ფრანგული ენის გამორჩეული მასწავლებელი, რომელიც საფრანგეთში ორკვირიან სტაჟირებას გაივლის.
ღონისძიებას ესწრებოდნენ შვეიცარიის ელჩი საქართველოში გიუნტერ ბეხლერი და დიპლომატიური მისიების სხვა წარმომადგენლები. გარდა ამისა, სასკოლო და საუნივერსიტეტო დაწესებულებების ფრანგული ენის პროფესორ-მასწავლებლები, მათი მოსწავლეები და სტუდენტები.
ფრანკოფონიის საერთაშორისო ორგანიზაცია 57 წევრ და 20 დამკვირვებელ ქვეყანას (მათ შორის საქართველოს) აერთიანებს, შესაბამისად, გაეროს წევრი ქვეყნების მოსახლეობის ერთი მესამედი ფრანგულ ენაზე მეტყველებს, ხუთივე კონტინენტზე კი, 220 მილიონზე მეტი ადამიანი მეტყველებს ფრანგულად. ფრანგულენოვანი მოსახლეობა, გერმანულენოვანი მოსახლეობის შემდეგ, ევროპაში ყველაზე მრავალრიცხოვანია.
