განათლებისა და მეცნიერების სამინისტროს განცხადება 53-ე სკოლაში არსებულ დარღვევებთან დაკავშირებით

სკოლის გათავისუფლებული დირექტორი ავრცელებს ცრუ ინფორმაციას იმის თაობაზე, რომ მხოლოდ 0.64 თეთრიანი დარღვევის შედეგად გათავისუფლდა, რაც არ შეესაბამება სინამდვილეს. დარღვევების სპექტრი მრავალფეროვანია:

ინსპექტირების ჯგუფის მიერ ადგილზე შემოწმებისას გამოვლინდა, რომ სკოლის ფართებით (6 საკლასო ოთახით) საგებლობს კერძო პირი, ისე, რომ არ იხდის სარგებლობის თანხას, არ არსებობს ხელშეკრულებები, არ არის განათლების სამინისტროს და ეკონომიკური სამინისტროს თანხმობა, არ ჩატარებულა აუქციონი

2013 წლის განმავლობაში მოქმედი იჯარის 12 ხელშეკრულება დადებულია კანონდარღვევით ჩატარებული აუქციონის საფუძველზე (ჯამში იჯარით გაცემული ფართი 1 600 კვ.მ–ზე მეტია);

მოიჯარეების მიერ თანხების გადახდა ხდებოდა დარღვევით, რაზედაც არ არის გადახდილი საურავები. ერთ-ერთ შპს-ს არ აქვს გადახდილი იჯარის თანხა 3 ათას 600 ლარის ოდენობით, საურავი, კომუნალური გადასახადი (საურავის ნაწილი და კომუნალური გადახდილ იქნა ინსპექტირების დასრულების შემდეგ)

მოიჯარეები გარკვეული პერიოდი სარგებლობდნენ სკოლის ფართით ხელშეკრულების გარეშე და საფასურის გადახდის გარეშე; იჯარით აღებული ფართის ნაცვლად იყენებდნენ სხვა ფართს, იჯარით გაცემული ფართი ნაკლები იყო რეალურად გამოყენებულ ფართთან შედარებით.

გარდა ამისა, სკოლაში დარღვეულია ბუღალტრული აღრიცხვის წესი (ხელმოუწერელი მემორიალური ორდერები);

დარღვეულია ინვენტარიზაციის ჩატარების წესი (ხელმოუწერელი საინვენტარიზაციო აღწერები);

დარღვეულია შესყიდვების განხორციელების წესი (არ არის დამტკიცებული შესყიდვების გეგმა, შესყიდვები განხორციელებულია ხელშეკრულების გარეშე);

სამი წელია არ არჩეულა ახალი დისციპლინური კომიტეტი (უნდა აირჩეს ყოველ წელს ახალი);

სასკოლო სასწავლო გეგმა დამტკიცებულია არასრულად;

წრეები შექმნილია ერთპიროვნულად დირექტორის ბრძანებით როცა უნდა იყოს განსაზღვრული სასკოლო სასწავლო გეგმით, დამტკიცებული და შეთანხმებული სამეურვეო საბჭოს მიერ;

გადასწორებულია ჟურნალები, მიუხედავად იმისა, რომ აღნიშნულთან დაკავშირებით სკოლას არაერთი მითითება აქვს მიცემული;

არცერთი პირველკლასელის პირადი საქმე არ იყო შევსებული (უნდა შევსებულიყო წლის დასაწყისში);

მოსწავლეთა ჩარიცხვა განხორციელებულია ამისათვის აუცილებელი დოკუმენტაციის გარეშე (კანონიერი წარმომადგენლის განცხადებისა და სანოტარო წესით დამოწმებული დაბ. მოწმობის წარდგენის გარეშე).