პროფესიული კოლეჯის კურსდამთავრებულები კერძო სექტორში დასაქმდნენ
ქობულეთის პროფესიულ საგანმანათლებლო დაწესებულებას „ახალი ტალღა“ და სასტუმრო ,,გურია პალასს" შორის გაფორმებული თანამშრომლობის შეთანხმების საფუძველზე, კოლეჯის კურსადმთავრებულებს სასტუმრო ,,გურია პალასი" სრულ მმართველობაში გადაეცათ. ამ ეტაპზე, სასტუმროს მენეჯმენტსა და მომსახურეობას სრულად ახორციელებს კოლეჯის „ახალი ტალღა“ კურსდამთავრებულები, აქვე საწარმოო პრაქტიკას გადიან შესაბამისი მიმართულების სტუდენტებიც.
სასტუმრო „გურია პალასში“ დასაქმებულ კურსდამთავრებულთა საქმიანობას, საქართველოს განათლებისა და მეცნიერების მინისტრის პირველი მოადგილე ქეთევან ნატრიაშვილი სხვა პროფესიული კოლეჯების ხელმძღვანელებთან ერთად გაეცნო, ქეთევან ნატრიაშვილი დამსაქმებელსა და დამსვენებლებსაც შეხვდა და მათი შეფასებებითაც დაინტერესდა.
პროფესიული კოლეჯის „ახალი ტალღა“ დირექტორის დავით მჭედლიშვილის განცხადებით, ეს კერძო სექტორთან განხორციელებული პირველი მასშტაბური პროექტია და კარგი სტიმული სტუდენტთა მომზადების დონისა და მათი მოტივაციის ასამაღლებლად.
პროფესიული სასწავლებლების თანამშრომლობა კერძო სექტორთან არის გარანტია სტუდენტთა საწარმოო პრაქტიკით უზრუნველყოფისა და შემდეგ წარმატებულ კურსდამთავრებულთა დასაქმების.
