ბირთვული კვლევების ევროპის ცენტრს ქართველი მოსწავლეები ეცნობიან
პროექტს საქართველოს განათლებისა და მეცნიერების სამინისტრო „განსაკუთრებით ნიჭიერი ახალგაზრდების წახალისების პროგრამის“ ფარგლებში ახორციელებს და მისი მიზანია მოსწავლეთა ინტერესის გაზრდა ზუსტი და საბუნებისმეტყველო საგნების მიმართ, მოსწავლეთა და პედაგოგთა მოტივაციის ამაღლება და ამ დისციპლინათა სწავლა-სწავლების ხარისხის ამაღლება.
გუნდური კონკურსები ზუსტ და საბუნებისმეტყველო მეცნიერებებში, სამინისტროს დაკვეთით, ახალგაზრდა შემოქმედთა სამეცნიერო ცენტრის „პროგრესის“ მიერ ჩატარდა. კონკურსების პრინციპი განსხვავდებოდა ტრადიციული ოლიმპიადების ფორმატისგან. საკონკურსო დავალების შესრულება მოსწავლისაგან მოითხოვდა გუნდურ მუშაობას, კვლევითი და კრეატიული უნარების გამოყენებას, თეორიული და ექსპერიმენტული სამუშაოების განხორციელებას და მიზნად ისახავდა დასახული ამოცანის/პრობლემის გადაჭრის გზის შემუშავებასა და რეალიზებას.
ფიზიკაში, ქიმიასა და ბიოლოგიაში მონაწილეობა მიიღეს IX კლასის მოსწავლეებმა, ხოლო მათემატიკაში - VII-IX კლასის მოსწავლეებმა. კონკურსების შედეგად, თითოეულ საგანში 3-3 გამარჯვებული გუნდი გამოვლინდა (გუნდი შედგებოდა 3 მოსწავლისა და ერთი ხელმძღვანელი პედაგოგისაგან).
სამინისტროს გადაწყვეტილებით, ზემოაღნიშნულ კონკურსებში გამარჯვებული გუნდები საერთაშორისო საგანმანათლებლო ექსკურსიებში (ცერნის ლაბორატორია და კოპერნიკის სამეცნიერო ცენტრი) მონაწილეობით დაჯილდოვდნენ.
