“ძველქართული-ძველსომხური დოკუმენტირებული ლექსიკონი”
თბილისის საკრებულოს გალერეაში ხელნაწერთა ეროვნული ცენტრისა და საქართველოს განათლებისა და მეცნიერების სამინისტროს მიერ გამოცემული წიგნის “ძველქართული-ძველსომხური დოკუმენტირებული ლექსიკონი” პრეზენტაცია და ილია აბულაძის საარქივო მასალის გამოფენა გაიმართა.
ღონისძიებას საქართველოს განათლებისა და მეცნიერების მინისტრი თამარ სანიკიძე, ხელნაწერთა ეროვნული ცენტრის დირექტორი ბუბა კუდავა, საკრებულოს თავმჯდომარე გიორგი ალიბეგაშვილი და სხვა მოწვეული სტუმრები დაესწრნენ.
ფილოლოგიის მეცნიერებათა დოქტორმა, არმენოლოგმა, ხელნაწერთა ეროვნული ცენტრის დამაარსებელმა და პირველმა დირექტორმა ილია აბულაძემ ლექსიკონის შედგენას თავისი ცხოვრების დიდი ნაწილი დაუთმო. სამწუხაროდ, წიგნის დასრულება სიცოცხლეში ვერ მოასწრო და გამოსაცემად მისმა მოწაფეებმა, ხელნაწერთა ეროვნული ცენტრის თანამშრომლებმა მოამზადეს.
„ძველქართული-ძველსომხური დოკუმენტირებული ლექსიკონი’’ თავისი ფუნქციით, შედგენილობითა და მოცულობით საეტაპო მნიშვნელობის შრომაა ქართველოლოგიისა და არმენოლოგიის ურთიერთშემხვედრი პრობლემებისა და ამოცანების კვლევა-ძიების საქმეში. ლექსიკონი თავისი სპეციფიკის გამო იშვიათი მოვლენაა აღმოსავლური მწერლობისა და კულტურის სფეროში.
ახალი გამოცემა საშუალებას მისცემს ქართული და სომხური ლიტერატურის ურთიერთმიმართების საკითხებით დაინტერესებულ პირებს მთელი რიგი ძეგლების ჩაკითხვის გარეშე მიიღონ მათთვის სასურველი ინფორმაცია ყველანაირი შინაარსი ლექსიკური ერთეულების შესახებ. ლექსიკონი შეასრულებს მასში ასახულ წყაროებში (ბიბლია და ჰაგიოგრაფიულ-ჰომილეტიკური ძეგლები) ორიენტირის ფუნქციას.
