მშვიდობის კორპუსთან მემორანდუმი გაფორმდა
საქართველოს განათლებისა და მეცნიერების მინისტრის მოადგილემ ალექსანდრე თევზაძემ და საქართველოში ა.შ.შ-ის მშვიდობის კორპუსის დირექტორის მოვალეობის შემსრულებელმა კარმენ შიჰანმა, ახალ, 5 წლიან ურთიერთგაგების მემორანდუმს მოაწერეს ხელი. მემორანდუმის ხელმოწერა კიდევ უფრო გააღრმავებს ურთიერთობას აშშ-სთან და ხელს შეუწყობს საქართველოს რეგიონებში ინგლისური ენის ცოდნის ამაღლებას.
მემორანდუმის საფუძველზე, 2018-2019 სასწავლო წლიდან 84 ინგლისური ენის მოხალისე პედაგოგი იმსახურებს საქართველოს 11 რეგიონში. მოხალისეები იმუშავებენ საჯარო სკოლის მოსწავლეებთან და დაეხმარებიან ინგლისური ენის ადგილობრივ პედაგოგებს. მოკლევადიანი მხარდაჭერის პროგრამის ფარგლებში, მშვიდობის კორპუსის მოხალისეები ასევე დაეხმარებიან პროფესიული კოლეჯების და რესურსცენტრების თანამშრომლებს, სტუდენტებს, დაინტერესებულ პირებს ინგლისური ენის ცოდნის, მასწავლებელთა პროფესიული უნარების განვითარებისა და სხვა მიმართულებით. ახალი მემორანდუმით, ასევე ამოქმედდება ახალგაზრდობის განვითარებაზე ორიენტირებული პროგრამები, რომელსაც ამერიკელი მოხალისეები საქართველოს განათლებისა და მეცნიერების სამინისტროს ახალგაზრდობის პოლიტისკის მართვის დეპარტამენტთან, ახალგაზრდულ ცენტრებთან და არასამთავრობო ორგანიზაციებთან ერთად განახორციელებენ.
სამსახურის დაწყებამდე, მოხალისეები გაივლიან ინტენსიურ წინასამსახურეობრივ ტრეინინგს, რომელიც მოიცავს ქართული ენის, კულტურისა და პროექტთან დაკავშირებული უნარების შესწავლას. მოხალისეები აქ ყოფნის 2 წლის განმავლობაში ქართულ მასპინძელ ოჯახებში იცხოვრებენ.
მშვიდობის კორპუსთან საქართველო 2001 წლიდან თანამშრომლობს და ამ ხნის მანძილზე, უკვე 815-ზე მეტმა მოხალისემ იმსახურა ჩვენს ქვეყანაში.
