„ჩაერთე რაგბიში“ - ერთ-ერთი პროექტი, რომელიც განათლების რეფორმის ფარგლებში ჯანსაღი ცხოვრების პოპულარიზაციისთვის განხორციელდება
„ჩაერთე რაგბიში“ არის ერთ-ერთი პროექტი, რომელსაც „ახალი სკოლის მოდელი“ გულისხმობს. ამ მიმართულებით, 150-ე საპილოტე სკოლაში აქტივობები ერთი სემესტრის განმავლობაში მიმდინარეობდა. რეფორმის ეს მიმართულება სპორტის მუდმივ, გრძელვადიან ჩართულობას გულისხმობს სასკოლო ცხოვრებაში და ჯანსაღი ცხოვრების პოპულარიზაციას ემსახურება. ერთიან პროექტზე მუშაობა აქტიურად მიმდინარეობს, თუმცა ცალკეული მიმართულებები უკვე ინერგება საპილოტე სკოლებში.
პროექტის პილოტირება სკოლაში 2018 წლის სექტემბერში დაიწყო და მასში I-IV კლასების ყველა მოსწავლე და პედაგოგი იყო ჩართული. მოსწავლეები სახალისო და უსაფრთხო ვარჯიში-თამაშებში იღებდნენ აქტიურ მონაწილეობას. საპოლოტე პროექტი განათლების, მეცნიერების, კულტურისა და სპორტის სამინისტროსა და საქართველოს რაგბის კავშირის თანამშრომლობით განხორციელდა და ჯანსაღი ცხოვრების პოპულარიზაციას, სასკოლო კულტურის განვითარებას და სწავლა-სწავლების პროცესის გამრავალფეროვნებას ისახავდა მიზნად. პროექტის დასასრულს, სკოლაში შიდა სასკოლო სპორტული ფესტივალი გაიმართა, რომლის ფარგლებშიც, თამაშებში სკოლის მოსწავლეებთან ერთად, პედაგოგები და მშობლებიც მონაწილეობდნენ.
