ბათუმში ვლადიმირ კომაროვის სახელობის ფიზიკა-მათემატიკის N199 საჯარო სკოლის ფილიალი აშენდა
თანამედროვე სტანდარტების შესაბამისი საგანმანათლებლო ინფრასტრუქტურა ახლად აშენებულ სკოლასა და კამპუსს აერთიანებს. მისი ფართობი ჯამში 7700 კვადრატული მეტრია.
სკოლის შენობა 250 მოსწავლეზეა გათვლილი და სრულად ადაპტირებულია სპეციალური საგანმანათლებლო საჭიროების მქონე მოსწავლეებისთვის.
შენობაში ფუნქციონირებს საბუნებისმეტყველო და კომპიუტერული ლაბორატორიები, ბიბლიოთეკა, სააქტო, სასადილო და სპორტული დარბაზი. ასევე კეთილმოწყობილია ღია სპორტული მოედანი და სარეკრეაციო ზონა.
რაც შეეხება სკოლის კამპუსს, მოსწავლეების საცხოვრებლად და დასასვენებლად შესაბამისი გარემოა შექმნილი. კამპუსიც სკოლის მსგავსად სრულად ადაპტირებულია სსსმ პირთათვის, შენობაში მოწყობილია საცხოვრებელი, სასწავლო, სასადილო ოთახები და სველი წერტილები.
მშენებლობა უმაღლესი ხარისხის, ეკოლოგიურად სუფთა მასალის გამოყენებით საქართველოს განათლების, მეცნიერების, კულტურისა და სპორტის სამინისტროს ინიციატივით, სსიპ საგანმანათლებლო და სამეცნიერო ინფრასტრუქტურის განვითარების სააგენტოს დაფინასნებითა და აჭარის ავტონომიური რესპუბლიკის მთავრობის მხარდაჭერით განხორციელდა. პროექტის ღირებულება ჯამში 11 მილიონ ლარზე მეტს შეადგენს.
